ԵՐԵՎԱՆ, 3 ապրիլի. /Նովոստի–Արմենիա/. Համաշխարհային կինոգործիչների ֆիլմերի դիտումներ, դրանցից հետո հոգևոր և համամարդկային արժեքների թեմաներով քննարկումներ են նախատեսված ժամանակակից արվեստի և հոգևոր կինոնկարների «Ֆրեսկո» փառատոնի շրջանակներում, որը կանցկացվի ամռանը Հայաստանում, լրագրողներին հայտնեց փառատոնի նախագահ Շահեն Նազարենկոն։
«Մենք նոր և շատ հետաքրքիր ձևաչափ ենք ընտրել. Փառատոնային ֆիլմերի ցուցադրությունները տեղի կունենան Երևանում և մարզերում` բաց երկնքի տակ։ Միաժամանակ դրանք նախևառաջ ցուցադրություն-քննարկումներ կլինեն»,- ասաց Նազարենկոն հինգշաբթի ասուլիսի ժամանակ։
Նա նշեց, որ փառատոնի շրջանակներում ցուցադրություններն անվճար կլինեն` ավելացնելով, որ դա կնպաստի շփմանը տարեց և երիտասարդ, ինչպես նաև սահմանափակ կարողություններով մարդկանց միջև։ Դրան, նրա խոսքերով, պետք է օգնի նաև ստեղծված ոչ պաշտոնական մթնոլորտը։
«Ֆրեսկոյի» մեկնարկը նախատեսվում է 2014 թվականի մայիս-հունիս ամիսներին և կտևի տասը օր։ Ֆիլմերը կցուցադրվեն ամենամարդաշատ վայրերում` այգիներում, եկեղեցիների մոտ, Հայաստանի տեսարժան վայրերում։
Փառատոնի հոգևոր խորհրդական Եսայի քահանա Արթենյանը նշեց, որ հասարակության մեջ հոգևոր թեմաներով շփումների բացը լրացնելու անհրաժեշտություն կա։
«Մենք հոգևոր և մարդասիրական ֆիլմեր դիտելու, հոգևոր, համամարդկային արժեքների և բարոյական հարցերով քննարկումների տարբեր առիթներ ունեցել ենք։ Դրանից հետո աստիճանաբար ծնվել է փառատոն անցկացնելու գաղափարը»,- նշեց նա։--0--
