Հայաստանի պետական երիտասարդական նվագախումբը կկատարի Դիսնեյի լավագույն մուլտֆիլմերի մեղեդիները

ԵՐԵՎԱՆ, 31 հունվարի. /Նովոստի–Արմենիա/. «Disney non-stop» նոր նախագծի շրջանակում Հայաստանի պետական երիտասարդական նվագախումբը ծրագրում է մայիսին կատարել «Disney» ստուդիայի լավագույն մուլտֆիլմերի մեղեդիները, «Նովոստի–Արմենիա» գործակալությանը հայտնեցին նվագախմբի մամուլի ծառայությունից։

«Առայժմ ծրագրի վերաբերյալ պաշտոնական հայտարարություն չկա, սակայն համերգները ծրագրված են մայիսի 30–ին և 31–ին Արամ Խաչատրյանի անվան համերգասրահում»,– հայտնեցին մամուլի ծառայությունից։

Նախագիծը կդառնա «Hollywood non-stop» ծրագրի շարունակությունը։ «Hollywood non-stop» նախագիծը մեկնարկել է 2012 թվականի ամռանը և հաջողությամբ անցկացվել հայկական ութ բուհում։ Ա.Խաչատրյանի անվան համերգասրահում անցկացված համերգներում, մասնավորապես, հնչել են «Ռոմեո և Ջուլիետ», «Կնքահայրը», «Մեկ անգամ Ամերիկայում», «Վեստսայդյան պատմություն», «Լեգենդ դաշնակահարի մասին», «Աստղային պատերազմներ», «Գլադիատոր», «Մալենա», «Առաքելությունն անիրագործելի է» ֆիլմերի մեղեդիներ։

Հայաստանի երիտասարդական նվագախումբը ստեղծվել է 2005 թվականի նոյեմբերին, իսկ 2008 թվականին ստացել է պետականի կարգավիճակ։ Դրա կազմում հանդես են գալիս միջազգային մրցույթների դափնեկիրներ և Վլադիմիր Սպիվակովի անվան բարեգործական միջազգային հիմնադրամի կրթաթոշակառուներ։ -0