Հայ նկարիչ, Գինեսի ռեկորդների գրքի բազմակի ռեկորդակիր Էդուարդ Տեր-Ղազարյանի բացառիկ միկրոմանրանկարները երկուշաբթի ներկայացվել են դպրոցականներին նվիրված մեկօրյա ցուցահանդեսի ընթացքում:
Ներկայացված աշխատանքների շարքում կարելի է նշել, օրինակ, «85 աշխատող փղեր մարդու մազի մեջ», «Դևիդ Կոպերֆիլդը զուգափայտի վրա», «Չարլի Չապլին», «Քարե ծաղիկներ»:
Հեղինակի խոսքով, ցուցահանդեսին ներկայացված աշխատանքները, հիմնականում, կատարվել են մարդու մազի վրա և ասեղի անցքի մեջ:
«Ես սկսել եմ միրկոքանդակներ սռեղծել 16 տարեկանից: Իմ առաջին աշխատանքներից մեկը կատարվել է ցորենի հատիկի վրա»,- երկուշաբթի լրագրողներին ասաց Տեր-Ղազարյանը:
Մանրանկարչության վարպետը պատմեց, որ իր աշխատանքի ընթացքում միշտ փորձել է փոքրացնել իր մանրանկարների չաթերը: Այսպես, սկզբում նա օգտագործել է բրնձի ամբողջահատիկ, իսկ ժամանակի ընթացքում՝ միայն կեսը:
Տեր-Ղազարյանն ավելացրեց նաև, որ, չնայած Հայաստանում ցուցահանդեսները հազվադեպ են անցկացվում, աշխարհում արդեն ցուցադրվել են նրա արդեն ավելի քան հազար միկրամանրանկարներ:
Տեր-Ղազարյանն ավելի քան հազար աշխատանք ունի: Նրա մանրանկարներ է նվիրել Ստալինին, Խրուշչովին, Խո Շի Մինին, Կաստրոյին, Գանդիին, Ռոքֆելերին, Մեծ Բրիտանիայի թագուհի Եղիսաբեթ 2-րդ-ին, Քլինթոնին և այլոց: Նկարչի շնորհիվ անցած դարի 70-ական թվականներին մանրանկարչությունում հայտնվեց նոր ճյուղ՝ շարժվող միկրոֆիգուրներ, որոնց առաջին նմուշները ցուցադրվել են 1975 թվականին Մոսկվայի Պոլիտեխնիկական թանգարանում:
Վարպետի աշխատանքները ցուցադրվել են հետխորհրդային տարածքի, Եվրոպայի և Ամերիկայի տարբեր թանգարաններում: Նկարչի՝ մանրադիտակների օգնությամբ 5 հազար անգամ մեծացման շնորհիվ ստեղծած ամենահայտնի ստեղծագործությունների թվում են՝ ուղտերի քարավանն ասեղի անցքում, թիթեռները կտրած մազի մեջ, սաքսոֆոնահարի ֆիգուրը կակաչի սերմի մեջ, խաչքար և Հիսուսի դիմապատկերը մետաղի կտորների վրա, վարդերի փունջ ձկան թեփուկներից և այլն:
Երաժիշտ, կոնցերտմեյստեր, երաժշտական գործիքների վարպետ, միկրոմանրանկարիչ, ծաղրանկարիչ, Հայաստանի ժողովրդական նկարիչ Էդուարդ Ավագի Տեր-Ղազարյանը ծնվել է 1923 թվականին, Երևանում: Նրա առաջին միկրոմանրանկարչական գործերը ցուցադրվել են 1974 թվականին՝ Երևանի ազգային պատկերասրահում: -0-
