Նարեկ Հախնազարյանը հաղթել է Չայկովսկու անվան մրցույթի «Թավջութակ» կատեգորիայում

ԵՐԵՎԱՆ, 1 հուլիսի. /Նովոստի-Արմենիա/. Չայկովսկու անվան XIV միջազգային մրցույթի «Թավջութակ» կատեգորիայում հաղթել է Հայաստանը ներկայացնող Նարեկ Հախնազարյանը, ով արժանացել է ոսկե մեդալի և 20 հազար եվրոյի, հաղորդել է «ՌԻԱ Նովոստիի» թղթակիցը մրցանակաբաշխության հանդիսավոր արարողությունից:

Հախնազարյանն արժանացել է նաև «Հանդիսատեսի համակրանք» մրցանակին հիանալի կատարման համար:

Երկրորդ տեղը զբաղեցրել է Ֆրանսիան ներկայացնող Էդգար Մորոն, ով արժանացել է արծաթե մեդալի և 15 հազար եվրոյի: Երրորդ տեղը (բրոնզե մեդալ և 10 հազար եվրո) զբաղեցրել է Բելառուսը ներկայացնող Իվան Կարիզնան:

Չորրորդ տեղը (5 հազար եվրո) զբաղեցրել է Գերմանիան ներկայացնող Նորբերտ Անգերը, իսկ հինգերորդ տեղը (3 հազար եվրո)՝ Իտալիան ներկայացնող Ումբերտո Կլերիչեն:

Պատմության ընթացքում առաջին անգամ և Միջազգային երաժշտական մրցույթների համաշխարհային ֆեդերացիայի աշխատանքի կանոններին համապատասխան՝ Չայկովսկու անվան XIV միջազգային մրցույթը կհամագործակցի երեք աշխարհահռչակ երաժշտական գործակալությունների հետ, որոնք կկազմակերպեն դափնեկիրների եռամյա հյուրախաղերը Ռուսաստանում և արտասահմանում:

Թավջութակահարների մրցույթի ժյուրիի անդամներն էին Կշիշտոֆ Պենդերեցկին, Մարիո Բրունելոն, Էնրիկո Դինդոն, Դավիթ Գերինգասը, Կլայու Գիլինսոնը, Լինն Հարելը, Ռալֆ Կիրշբաումը, Անտոնիո Մենեսեսուն, Գուստավու Ռիվինիուսը, Սերգեյ Ռոլդուգինը, Մարտի Ռոուսը և Նատալյա Գուտմանը: