Հայ հայտնի նկարիչների կտավներն են ներկայացվել ցուցահանդեսում, որն անցկացվում է Նիդեռլանդների Գրոնինգեն քաղաքի լավագույն թանգարաններից մեկում 2010 թվականի դեկտեմբերի 19-ից և կշարունակվի մինչև մայիսի 8-ը, տեղեկացնում է Հայաստանի մշակույթի նախարարության մամուլի ծառայությունը։
Հաղորդագրության համաձայն, «Ռուսաստան և օրիենտալիզմ» խորագրով ցուցահանդեսում ներկայացված են նախկին խորհրդային երկրների արվեստագետների արևելյան թեմաներով ստեղծագործությունները։
Հաղորդագրությունում նշվում է, որ Գրոնինգենի ցուցահանդեսին Հայաստանը ներկայացրել է 8 կտավ Մարտիրոս Սարյանի տուն-թանգարանից և 5 աշխատանք` Հայաստանի ազգային պատկերասրահից` Սուրենյանց, Սարյան, Պոլենով, Շարբաբչյան և 19-րդ դարի անհայտ նկարչի 1 աշխատանք:
«Կազմակերպիչների հավաստմամբ Հոլանդիայի ու Եվրոպայի արվեստասերների համար իսկական հայտնություն կարող է լինել Մարտիրոս Սարյանի էսթետիկան` որը շատ ինքնատիպ է, սակայն, նաև բնորոշ այդ ժամանակաշրջանի եվրոպական արվեստի սկզբունքներին»,- ասվում է հաղորդագրությունում։
«Անհայտ ռուսական արևելքը» ներկայացնում է 19-րդ դարեվերջի և 20-րդ դարի սկզբի ռուս նկարիչներ Վերեշչագինի ու Պոլենովի` Ռուսաստանի հարավի ու Մերձավոր Արևելքի էկզոտիկ երկրներում կատարած ճանապարհորդական փաստագիր աշխատանքներն ու 19-20-րդ դարերի սահմանագծին նույն թեմատիկայով ստեղծագործող արևելքի գեղանկարիչների գործերը: -0-
