Թբիլիսիում փլուզված Սբ. Գևորգ եկեղեցին անպայման կվերականգնվի. Հայաստանում Վրաստանի դեսպան

ԵՐԵՎԱՆ, 11 մարտի. /Նովոստի-Արմենիա/. Թբիլիսիում փլուզված Սբ. Գևորգ հայկական եկեղեցին անպայման կվերականգնվի, հինգշաբթի լրագրողներին ասաց Հայաստանում Վրաստանի դեսպան Գրիգոլ Տաբատաձեն:

Թբիլիսիում 1356 թ.-ին կառուցված Սբ. Գևորգ հայկական եկեղեցին փլուզվել է 2009թ. վերջին: Այդ կապակցությամբ Հայ Առաքելական Եկեղեցին և մի շարք հասարակական կազմակերպություններ խիստ քննադատության են ենթարկել վրացական իշխանությունների անգործությունը:

«Եկեղեցու վերականգնման մասին Հայաստանի և Վրաստանի մշակույթի նախարարությունների միջև բանակցություններից հետո տվյալ հարցը քննարկվել է նաև 2010թ. հունվարին հայ-վրացական միջկառավարական հանձնաժողովի նիստի ժամանակ»,- ասաց դեսպանը:

Տաբատաձեն նշեց, որ իր տվյալներով տաճարի վերականգնման հետ կապված ֆինանսական հաշվարկների աշխատանքներն արդեն սկսվել են:

Նշելով, որ եկեղեցու փլուզումը չափազանց ցավալի փաստ է, դեսպանն ընդգծեց, որ այս տարի Վրաստանում լիովին վերականգնվել է հայկական Սբ. Էջմիածին եկեղեցին, որտեղ հունվարի 6-ին՝ Սուրբ Ծննդյան տոնին, առաջին հոգևոր արարողոթյունն անցկացվեց:

Սբ. Գևորգ եկեղեցին ընդգրկված է այն հուշարձանների շարքում, որոնց  ծագումը վրացական կողմը համարում է վիճահարույց, սակայն Հայաստանի համար դրանց ծագումը որևէ կասկած չի հարուցում:

Թբիլիսիում գործում է ընդամենը երկու հայկական եկեղեցի՝ Սբ. Գևորգ մայր տաճարն ու Սբ. Էջմիածինը, որոնք գտնվում է Հավլաբարի շրջանում, ևս հինգ եկեղեցի էլ, այսպես կոչված, վիճահարույց կարգավիճակում են, դրանք են՝ Կարմիր ավետարան եկեղեցին, Սբ. Մինասը, Սբ. Նշանը, Սբ. Նորաշենն ու ավերված Սբ. Գևորգը:

Սբ. Գևորգ եկեղեցին արդեն երկրորդ ավերված եկեղեցին է: 1989 թ.-ին ավերվել էր հայկական Կարմիր ավետարան եկեղեցին: --0--