ԵՐԵՎԱՆ, 17 հունվարի. /Նովոստի–Արմենիա/. Աշխարհահռչակ ծովանկարիչ Իվան (Հովհաննես) Այվազովսկու ծննդյան 200–ամյակին նվիրված ցուցահանդես կկայանա Երևանում 2017 թվականի մայիսին, երեքշաբթի մամուլի ասուլիսում հայտնեց Հայաստանի ազգային պատկերասրահի տնօրեն Արման Ծատուրյանը։
«Ցուցահանդեսը կկայանա Հայաստանի ազգային պատկերասրահում, նրան մենք արդեն մեկ տարուց ավելի ենք պատրաստվում։ Ցուցահանդեսում ներկայացված կլինեն Այվազովսկու ավելի քան 70 աշխատանքներ, որոնք պահվում են մեր պատկերասրահում, այդ թվում` նրա գրաֆիկական աշխատանքները, որոնք նախկինում չեն ցուցադրվել»,– հայտնեց Ծատուրյանը։
Ըստ նրա, հատուկ ցուցահանդեսի համար Հայաստան կբերվեն 16 կտավներ Տրետյակովի պատկերասրահից, Պետերգոֆից և Ռուսական թանգարանից։
«Այս պահին մենք բանակցություններ ենք վարում Մխիթարյան միաբանության հետ, որ Երևանում ներկայացնենք Այվազովսկու «Քաոս» կտավը, որը նրա գլուխգործոցներից է համարվում։ Մտադիր ենք նաև վերակագնել այն բոլոր ցուցասրահները, որտեղ կներկայացվեն նկարները, և եթե մեզ հաջողվի դա իրականացնել, ապա, վստահեցնում եմ, որ դա բացառիկ ցուցահանդես կլինի»,– ասաց նա։
Ծատուրյանի խոսքով, Թեոդոսիայի Ի.Այվազովսկու անվան պատկերասրահի նկարները չեն ցուցադրվի, քանի որ այդ աշխատանքները ցուցադրվում են միայն Ռուսաստանի տարածքում։
Իվան Այվազովսկին 19–րդ դարի հայազգի առավել հայտնի ծովանկարիչ է։ Նրա հարազատ եղբայրը` Գաբրիել Այվազովսկին հայ հոգևորական էր, գիտնական–պատմաբան, լեզվաբան և պոլիգլոտ, սովորել է Վենետիկի Մխիթարյանների միաբանությունում։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
