ԵՐԵՎԱՆ, 28 հոկտեմբերի. /Նովոստի–Արմենիա/. Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սամբատյանը ելույթ է ունեցել ամենահայտնի համաշխարհային բեմերից մեկում` Նյու Յորքի «Carnegie Hall»–ում, հայտնում է նվագախմբի մամուլի ծառայությունը։
Հաղորդման համաձայն, համերգի ժամանակ Սմբատյանը ղեկավարել է Կորեայի կամերային նվագախումբը` դառնալով ամենաերիտասարդ հայ դիրրիժոր, ով ելույթ է ունեցել այդ հեղինակավոր բեմում։
Համերգին ելույթ է ունեցել նաև հայտնի երգչուհի Կառլի Պաոլին (մեցցո–սոպրանո), հարավկորեական ջութակահար Սոյունգ Յունը` իր ժամանակի ամենավառ երաժիշտներից մեկը և «ՅՈՒՆԵՍԿՕ–ի արտիստները հանուն խաղաղության» երաժիշտներ` Ինո Միրկովիչը (ջութակ), Միլտոն Մասկիադրին (կոնտրաբաս) և Մին Կիմը (երաժշտական ղեկավար)։
Հնչել են Պիացոլայի (Տարվա եղանակներ), Մենդելսոնի (Սիմֆոնիա № 10), Շուբերտի, Բոտեզինիի, Գերշվինի, Էլգարի և այլ կոմպոզիտորների գործեր։ Երկու մասից բաղկացած գալա համերգը տևել է մոտ երկուսուկես ժամ։
«Carnegie Hall»–ի համերգը Կորեայի կամերային նվագախմբի 50–ամյակի առթիվ կազմակերպած համաշխարհային շրջագայության մի մասն է։ 2015 թվականին նվագախումբը Սմբատյանի և ամերիկացի աշխարհահռչակ դերասան Ջոն Մալկովիչի հետ արդեն երկու համերգ է ներկայացրել Սեուլի արվեստի կենտրոնում և Մոսկվայում։
Հայ դիրիժորի հաջորդ համերգը Կորեայի կամերային նվագախմբի հետ կկայանա հոկտեմբերի 31–ին, Նոր Անգլիայի «Jordan Hall» կոնսերվատորիայում (Բոստոն)։
Համերգները Միացյալ Նահանգներում անցկացվում են ՅՈՒՆԵՍԿՕ–ի հովանու ներքո և նվիրված են կազմակերպության 70–ամյակին։
Սերգեյ Սմբատյանը ղեկավարել է այնպիսի հեղինակավոր նվագախմբեր, ինչպես Դրեզդենի ֆիլհարմոնիկը, Չեխական ռադիոյի սիմֆոնիկ նվագախումբը, Տամպերեի ֆիլհարմոնիկ նվագախումբը, Մարիինյան թատրոնի սիմֆոնիկ նվագախումբը, Գերմանիայի սիմֆոնիկ նվագախումբը. Լեհաստանի ազգային ռադիոյի սիմֆոնիկ նվագախումբը, Մոսկվայի ֆիլհարմոնիան, Մոսկվայի պետական ակադեմիական սիմֆոնիկ նվագախումբը, Վարշավայի ֆիլհարմոնիկ նվագախումբը և շատ այլ նվագախմբեր` ներկայացնելով հայ և համաշխարհային կոմպոզիտորների ստեղծագործություններ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
