«Սպիտակ» ֆիլմը ճանաչվել է լավագույնը Տիխոնովի անվան «17 ակնթարթներ» փառատոնի ժամանակ

ԵՐԵՎԱՆ, 11 փետրվարի./Նովոստի–Արմենիա/. Ռուս կինոռեժիսոր Ալեքսանդր Կոտի «Սպիտակ» ֆիլմն արժանացել է դերասան Վյաչեսլավ Տիխոնովի անվան «17 ակնթարթներ» երրորդ միջազգային փառատոնի գլխավոր մրցանակին։ 

Այս մասին ՏԱՍՍ–ին հաղորդել են փառատոնի կազմակերպիչները, որն անցկացվել է Մերձմոսկվայում փետրվարի 6–10–ը։ 

Ֆիլմը հաղթել է «Լավագույն ռեժիսուրա» և «Լավագույն կոմպոզիտոր» անվանակարգերում։ Ֆիլմի կոմպոզիտորն է System of a Down ամերիկյան ռոք–խմբի մենակատար Սերժ Թանկյանը։ 

«Սպիտակ» ֆիլմը պատմում է 1988թ.–ի դեկտեմբերի 7–ին Սպիտակ քաղաքում տեղի ունեցած ավերիչ երկրաշարժի մասին, որի հետևանքով զոհվեց 25 հազար մարդ, ավելի քան կես միլիոն մարդ մնաց անօթևան։ Ֆիլմում նկարահանվել են Լերնիկ Հարությունյանը, Հերմինե Ստեփանյանը, Ալեքսանդրա Պոլիտիկը և այլք։

Փառատոնի մասին

Փառատոնին մասնակցել է 9 ֆիլմ` 7 երկրից և 9 սերիալ։ Ծրագրում ներկայացվել են Ռուսաստանի, Ֆրանսիայի, Բելառուսի, Չեխիայի, Լեհաստանի և Իսրայելի ներկայացուցիչների աշխատանքները։

Փառատոնի ժյուրիի կազմը գլխավորել է ժողովրդական արտիստ, դերասան և ռեժիսոր Սերգեյ Նիկոնենկոն։ Ժյուրիի կազմում ներառվել են Ռուսաստանի ժողովրդական արտիստ, դերասանուհի Նատալիա Վառլեյը, դերասան Մարտինիշ Վիլսոնը (Լատվիա), Ստեղծագործական ժառանգության բարեգործական հիմնադրամի նախագահ Միքայելա Թարիվերդիևան, Կալինինգրադի Մայր տաճարի տնօրեն Վերա Թարիվերդիևան, ինչպես նաև հեռուստահաղորդավար և կինոքննադատ Անդրեյ Սմիրնովը։–0–