«Միշտ երազել եմ ըստ արժանվույն ներկայացնել Հայաստանը «Եվրատեսիլում»». հույն երգչուհի Աթենա Մանուկյան (ՎԻԴԵՈ)

ԵՐԵՎԱՆ, 12 փետրվարի./Նովոստի–Արմենիա/. Հայաստանի ամենատաղանդավոր կատարողներն ու երաժշտական խմբերը պայքարում են «Եվրատեսիլ» երգի միջազգային մրցույթում Հայաստանը ներկայացնելու հնարավորության համար։ Թեկնածուներից մեկն է հունաստանաբնակ հայտնի հայ երգչուհի Աթենա Մանուկյանը, ով եկել է Հայաստան մրցույթին մասնակցելու համար։

Ավելի վաղ Մանուկյանը մասնակցել է X Factor բրիտանական շոուում, որտեղ գերել է ժյուրիին։

Երգչուհին չորեքշաբթի ասուլիսի ժամանակ նշեց, որ որոշել է մասնակցել «Դեպի Եվրատեսիլ» հայկական նախագծում, քանի որ ուզում է, որպեսզի Հայաստանը հպարտանա իր ելույթով «Եվրատեսիլում»։ Նրա խոսքով, նա միշտ երազել է այդ մասին։

«Ունեմ տարբեր շոուներին և նախագծերին մասնակցելու հարուստ փորձ, ես ինքս կարող եմ անել լավ, որակյալ շոու», – խոստովանեց Աթենան։

Նա նշեց, որ «Chains On You» մրցութային երգը գրել է պրոդյուսերի հետ, խոսքերի հեղինակն ինքն է։
«Երգի հիմնական մեսիջն այն է, որ մեզնից յուրաքանչյուրի ներսում կա ադամանդ, որը մարդիկ հաճախ ուզում են վերցնել։ Սակայն յուրաքանչյուրն ունի տաղանդ, որը կընդունվի և կգնահատվի», – նշեց երգչուհին։

Աթենան առաջին անգամ չի Հայաստանում, նրա ընտանիքը ևս երազում է այցելել, սակայն դա դեռ իրականություն չի դարձել։

Երգչուհին պատմեց, որ արդեն հասցրել է տեսնել բազմաթիվ տեսարժան վայրեր, համտեսել հայկական խոհանոցի ուտեստներ` նշելով, որ հայկական ամենասիրելի ճաշատեսակը սպասն է։

Անդրադառնալով ստեղծագործական ծրագրերին` երգչուհին ասաց, որ շատ է ուզում կատարել հայկական երգ` ներառելով այն իր երգացանկում։

«Ուզում եմ մնալ Հայաստանում, այստեղ ստեղծել երգեր և ինչու ոչ` համագործակցել հայ սուպերաստղերի հետ։ Շատ եմ ուզում աշխատել հայկական շոու բիզնեսում», – նշեց Աթենան։

Հունվարի 28–ին «Դեպի Եվրատեսիլ 2020» նախագծի ժյուրին ընտրել է 12 թեկնածուների (Աթենա Մանուկյան, TOKIONINE, ERNA, Մարիամ Բաղդասարյան, Agop, Կարինա EVN, Վլադիմիր Արզումանյան, Հայկ Music, Արթուր Ալեքս, Գաբրիել Ջիգ, EVA Rida, Սերգեյ և Նիկոլայ Հարությունյաններ), որոնցից մեկը հնարավորություն կստանա մասնակցել «Եվրատեսիլ» երգի միջազգային մրցույթին։

Այս տարի Հայաստանի ներկայացուցիչը ելույթ կունենա «Եվրատեսիլ 2020»–ի երկրորդ կիսաեզրափակչում, որը կանցկացվի մայիսին Ռոտերդամում։–0–