Հրապարակվել է Kill Dim մուլտֆիլմի բլից-սերիաների անթոլոգիան` Ղարաբաղում հրետակոծությունների թեմայով (ՏԵՍԱՆՅՈՒԹ)

ԵՐԵՎԱՆ, 5 մայիսի. /Նովոստի-Արմենիա/. «Ռոբերտ Սահակյանց փրոդաքշն» ստուդիան թողարկել է հանրաճանաչ Kill Dim մուլտիպլիկացիոն սերիալի բլից-սերիաների անթոլոգիան` նվիրված ղարաբաղա–ադրբեջանական շփման գծում իրավիճակի կտրուկ սրման թեմային:

«Անթոլոգիայում ներառվել են հինգ բլից-սերիաներ, որոնք մենք ստեղծել ենք վերջին ամսվա ընթացքում», - «Նովոստի-Արմենիա» գործակալությանն ասաց ստուդիայի ղեկավար, ռեժիսոր, մուլտիպլիկատոր Դավիթ Սահակյանցը: Նրա խոսքով, նախատեսվում է թողարկել նոր սերիաներ, սակայն ժամկետները դեռ որոշված չեն:

Մինչ նոր անթոլոգիան, «Ռոբերտ Սահակյանց փրոդաքշնը» թողարկել է Kill Dim սերիալի յոթ լիամետրաժ սերիա, որոնք պատմում են ղարաբաղա–ադրբեջանական շփման գծում ադրբեջանցի զինվորի արկածների մասին։

Ապրիլի 2–ից 5–ն ադրբեջանական ԶՈՒ–ն ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–