Հայկական ֆիլմը հավակնում է «Օսկարի»

ԵՐԵՎԱՆ, 16 հոկտեմբերի. /Նովոստի Արմենիա/. Հայ ռեժիսոր Անահիտ Աբադիի «Եվա» ֆիլմն ընդգրկվել է Ամերիկյան կինոակադեմիայի 90-րդ Օսկար մրցանակաբշխության նախնական ցանկում։

Ինչպես հայտնում է ՀՀ Ազգային կինոակադեմիայի լրատվական ծառայությունը, ֆիլմը ներառվել է «Լավագույն օտարալեզու ֆիլմ» անվանակարգում։

Ամերիկյան կինոակադեմիայի «Լավագույն օտարալեզու ֆիլմ» անվանակարգի համար այս տարի ռեկորդային թվով երկրներ են հայտեր ներկայացրել՝ 92 երկիր, որոնցից 6-ը՝ պատմության մեջ առաջին անգամ:

Հայալեզու ֆիլմը Հայաստանի և Իրանի համատեղ արտադրությունն է: Կինոնկարը նկարահանվել է «Հայաստանի ազգային կինոկենտրոնի» և «Ֆարաբի կինոյի հիմնադրամի» ֆինանսական աջակցությամբ:

Կինոնկարը դրամատիկ պատմություն է կնոջ մասին, ով ուզում է մոռանալ տարիներ առաջ իր կյանքում տեղի ունեցած մութ ու ծանր պատմությունը։ Եվան դստեր հետ հեռանում է Երևանից, հաստատվում է Արցախում՝ ծանոթների մոտ։ Սակայն, անցյալը ամենուր հետապնդում է նրան։