Հայ–կիպրական «գրավիտացիա» Եվրատեսիլում. Հովիկ Դեմիրճյանը ներկայացրել է իր մրցութային երգի տեսահոլովակը

ԵՐԵՎԱՆ, 2 մարտի. /Նովոստի–Արմենիա/. Համացանցում հայտնվել է «Gravity» (Գրավիտացիա) երգի տեսահոլովակը, որով կիպրոսահայ երգիչ Հովիկ (Hovig) Դեմիրճյանը հանդես կգա Կիևում կայանալիք «Եվրատեսիլ 2017»–ում։

Հովիկը 27 տարեկան է, 2009 թ.–ին մասնակցել է X Factor Greece նախագծին և CyBC կիպրական հեռարձակող ընկերության կողմից ընտրվել է «Եվրատեսիլում» Կիպրոսը ներկայացնելու համար։


Տեսահոլովակի պրեմիերայից հետո հայտնվեց առաջին արձագանքը Երևանից։ «Եվրատեսիլին» Հայաստանը ներկայացնող երգչուհի Արծվիկը գովել է հայրենակցին լավ աշխատանքի համար, իսկ Հայաստանի պատվիրակության ղեկավար Գոհար Գասպարյանը շնորհավորել է Հովիկին` մաղթելով հաջողություն։

«Եվրատեսիլ 2017» մրցույթի կիսաեզրափակիչները կանցկացվեն Կիևում մայիսի 9–ին և 11–ին, իսկ եզրափակիչը` մայիսի 13–ին։ Մրցույթին մասնակցում է 43 երկիր։

Հայաստանը մրցույթում մասնակցում է 2006 թ.–ից։ Լավագույն արդյունքներն (4–րդ տեղ) ապահովել է Սիրուշով 2008 թ.–ին և Արամ MP3–ը 2014 թ.–ին։–0–