Երևանում նոր աստղեր «վառվեցին» «Ոսկե ծիրանի» մեկնարկի շրջանակում
![Երևանում նոր աստղեր «վառվեցին» «Ոսկե ծիրանի» մեկնարկի շրջանակում Երևանում նոր աստղեր «վառվեցին» «Ոսկե ծիրանի» մեկնարկի շրջանակում](/upload/iblock/cf3/4w9phv5gfaaiu850ubhw4to1z17t2zr4.jpg)
ԵՐԵՎԱՆ, 10 հուլիսի./Նովոստի–Արմենիա/. Հայկական կինոյի երեք հռչակավոր գործիչների աստղերը «վառվեցին» կիրակի Երևանում «Ոսկե ծիրան» միջազգային 14–րդ կինոփառատոնի բացման շրջանակում։
«Ոսկե ծիրան» կինոփառատոնն անցկացվում է հուլիսի 9–16–ը «Մշակույթների և քաղաքակրթությունների խաչմերուկ» նշանաբանի ներքո։
Ռեժիսորներ Ֆրունզե Դովլաթյանի, Սերգեյ Իսրայելյանի և Յուրի Երզնկյանի աստղերն այսուհետ կզարդարեն Ազնավուրի հրապարակի Փառքի ծառուղին` «Մոսկվա» կինոթատրոնի մոտակայքում։ Աստղերի բացման արարողությունն ուղեկցվեց այն ֆիլմերի երաժշտությամբ, որոնցում մասնակցել են արվեստի այս լեգենդար գործիչները։
«Դովլաթյանը, Իսրայելյանը, Երզնկյանն այն մարդիկ են, ովքեր նշանակալի դարձրեցին նախորդ դարի 60–80–ականների հայկական կինոն։ Եվ մենք աշխատել, աճել ենք այդ ֆիլմերի ազդեցության ներքո, և ամենակարևորն է` նրանց հետ պրոֆեսիոնալ, անձնական և մարդկային շփման շնորհիվ», – լրագրողներին ասաց Երևանի թատրոնի և կինոյի պետական ինստիտուտի ռեկտոր Դավիթ Մուրադյանը։
Նա նաև նշեց, որ «Ոսկե ծիրան» փառատոնի շնորհիվ Հայաստանը բացվում է աշխարհի համար։
«Ամեն անգամ, երբ սկսվում է «Ոսկե ծիրանը», ես համոզվում եմ, որ Հայաստանը փոքր երկիր չէ, քանզի փոքր երկիրը չի կարող կազմակերպել նման փառատոն։ Եվ մենք ռիսկի դիմեցինք, և ստացվեց։ Մենք դառնում ենք աշխարհի մասնիկ, և աշխարհը գալիս է մեզ մոտ», – ավելացրեց Մուրադյանը։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից, այն տարածաշրջանի ամենաճանաչված փառատոներից մեկն է: Փառատոնը կազմակերպվում է ՀՀ մշակույթի նախարարության և VivaCell-MTS ընկերության աջակցությամբ։ Տարբեր տարիներին Հայաստան են ժամանել հայտնի դերասաններ և ռեժիսորներ, որոնց թվում են նաև գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։
2010 թ.–ին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:–0–