«Ոսկե ծիրան» Երևանի միջազգային 13-րդ կինոփառատոնը հագեցած կլինի բացօթյա կինոդիտումներով

17.06.2016, 19:26
«Ոսկե ծիրան» Երևանի միջազգային 13-րդ կինոփառատոնի շրջանակում Կարապի լճի տարածքում կկազմակերպվեն բացօթյա կինոդիտումներ:
«Ոսկե ծիրան» Երևանի միջազգային 13-րդ կինոփառատոնը հագեցած կլինի բացօթյա կինոդիտումներով
ԵՐԵՎԱՆ, 17 հունիսի. /Նովոստի–Արմենիա/. «Ոսկե ծիրան» Երևանի միջազգային 13-րդ կինոփառատոնի շրջանակում Կարապի լճի տարածքում կկազմակերպվեն բացօթյա կինոդիտումներ, հաղորդում է Երևանի քաղաքապետարանի մամուլի ծառայությունը։

Կինոփառատոնը կանցկացվի հուլիսի 10–17–ը։ Փառատոնի մրցութային և արտամրցութային ծրագրերում ներառվել է 135 ֆիլմ։

Մամուլի հաղորդագրության համաձայն` ծրագրի ընթացքին և օրակարգին երևանցիներն ու մայրաքաղաքի հյուրերը կկարողանան ծանոթանալ Երևանի տարբեր հատվածներում տեղադրված տեսաէկրաններից:

Կինոփառատոնի բոլոր օրերին Ազնավուրի անվան հրապարակում կհնչի երևանյան ջազ՝ անվանի ջազ գործիչների և ջազ բենդերի մասնակցությամբ:

 - рис.1

Այս տարի Ազատության հրապարակում կտեղակայվի շարժական կինոավտոմոբիլ, որով պարբերաբար կցուցադրվեն ամենատարբեր ժանրերի ֆիլմեր:

«Ոսկե ծիրանի» շրջանակում այս տարի նախատեսված են մի շարք ծրագրեր` «Հայկական կինո. արդի ժամանակներ», «Վիլյամ Շեքսպիրի մահվան 400–րդ տարելիցին» նվիրված ծրագիրը, ինչպես նաև «Ֆրանսիական նոր կինո», «Դանիական նոր կինո» և «Բասկական նոր կինո» ծրագրերը։

«Ոսկե ծիրան» միջազգային կինոփառատոնը Երևանում անցկացվում է 2004թ.-ից, այն տարածաշրջանի ամենաճանաչված փառատոներից մեկն է: Փառատոնը կազմակերպվում է ՀՀ մշակույթի նախարարության և VivaCell-MTS ընկերության աջակցությամբ։ Տարբեր տարիներին Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։

«Նովոստի–Արմենիա» գործակալությունը փառատոնի ինֆորմացիոն հովանավորն է։

2010 թվակաժնին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:–0–