Եթե չպատասխանեն մեր հարցին, դուրս կգանք ՀԱՊԿ-ից․ Փաշինյան (ՎԻԴԵՈ)

ԵՐԵՎԱՆ, 12 մարտի․/Նովոստի–Արմենիա/․ ՀՀ վարչապետ Նիկոլ Փաշինյանը հնարավոր է համարել ՀԱՊԿ–ից Հայաստանի դուրս գալը՝ պարզաբանելով, թե որ դեպքում դա տեղի կունենա։

Այսօր ասուլիսի ժամանակ մեկնաբանելով ՀԱՊԿ–ում Հայաստանի մասնակցության սառեցման մասին հայտարարությունը՝ նա առաջարկեց չշփոթել քաղաքական դիրքորոշումը իրավական գործընթացների հետ։

«Այո, մենք ՀԱՊԿ-ում փաստացիորեն մեր գործունեությունը սառեցրել ենք։ Ի՞նչ է դա նշանակում։ Դա նշանակում է՝ մենք նիստերի չենք մասնակցում, ներկայացուցիչ չունենք։ Դա դե յուրե որոշու՞մ է, թե՞ դե յուրե որոշում չէ։ Հարց չի ծագու՞մ՝ ինչու՞ ՀՀ-ն ՀԱՊԿ-ում մշտական ներկայացուցիչ չունի, ինչու՞ ՀՀ-ն չի օգտագործում ՀԱՊԿ-ի գլխավոր քարտուղարի տեղակալ նշանակելու իր քվոտան, ինչու՞ ՀՀ-ն կարծիք չի արտահայտում ՀԱՊԿ-ում շրջանառվող փաստաթղթերի վերաբերյալ»,- ասաց նա։

Փաշինյանի խոսքով, պաշտոնական Երևանը հիմա խնդրում, ակնկալում, նաև պահանջում է, որ ՀԱՊԿ-ի գործընկերները պատասխանեն մի հարցի՝ «Ո՞րն է ՀԱՊԿ պատասխանատվության գոտին ՀՀ-ում»։

Փաշինյանը վստահեցրեց, որ ՝ Հայաստանը ՀԱՊԿ-ի հետ կապված պրոբլեմ չի ստեղծել ոչ մի բանում։

«Բոլոր պրոբլեմները ստեղծվել են այն կետից, երբ մենք հարց ենք բարձրացրել, թե որն է ՀԱՊԿ պատասխանատվության գոտին ՀՀ-ում և այդ հարցի պատասխանը չենք ստացել։ 2021թ. մայիսի իրադարձություններից հետո արձանագրել ենք պաշտոնապես, որ կարմիր գիծը հատված է», - ասաց Փաշինյանը։
ՀՀ–ում ՀԱՊԿ–ի պատասխանատվության գոտու մասին հարցի պատասխանը չստանալու դեպքում, Փաշինյանի խոսքով, Հայաստանը պարզապես դուրս կգա ՀԱՊԿ-ից։

«Եթե ՀԱՊԿ-ը կպատասխանի այդ հարցին և այդ պատասխանը կհամապատասխանի մեր պատկերացումներին, կնշանակի, որ ՀՀ և ՀԱՊԿ-ի միջև հարցերը հասցեագրված են, լուծված են, ամփոփված են՝ սրանից բխող հետևանքներով։ Եթե ոչ՝ Հայաստանի Հանրապետությունը դուրս կգա ՀԱՊԿ-ից։ Երբ՝ չեմ կարող ասել», – ասաց Փաշինյանը։–0–