Ուկրաինան արգելել է «Եվրատեսիլում» Ռուսաստանը ներկայացնող Յուլիա Սամոյլովային մուտք գործել երկիր

ԵՐԵՎԱՆ, 22 մարտի. /Նովոստի–Արմենիա/. Ուկրաինայի անվտանգության ծառայությունը (ՈւԱԾ) երեք տարով արգելել է «Եվրատեսիլում» Ռուսաստանը ներկայացնող Յուլիա Սամոյլովային մուտք գործել երկիր։

Այս մասին, ինչպես հաղորդում է ՏԱՍՍ–ը, տեղեկացրել է ՈւԱԾ–ի մամուլի քարտուղար Ելենա Գիտլյանսկայան։


«Ուկրաինայի անվտանգության ծառայությունը երեք տարով արգելել է ՌԴ քաղաքացի Յուլիա Սամոյլովային մուտք գործել Ուկրաինա։ Որոշումն ընդունվել է` հաշվի առնելով տվյալներն այն մասին, որ նա խախտել է Ուկրաինայի օրենսդրությունը», – գրել է նա Facebook–ում։


«Եվրատեսիլ» մրցույթի կիսաեզրափակիչները կանցկացվեն Կիևում մայիսի 9–ին և 11–ին, եզրափակիչը` մայիսի 13–ին։ Մրցույթը կանցկացվի Միջազգային ցուցահանդեսային կենտրոնում։ Այս տարի մրցույթին կմասնակցի 43 երկիր։

Ուկրաինայի անվտանգության ծառայությունը կարծում է, որ, 2015 թ.–ի ամռանը ելույթ ունենալով Ղրիմում կազմակերպված համերգին, Սամոյլովան խախտել է Ուկրաինայի նախարարների կաբինետի որոշումը, ըստ որի` օտարերկրացիները պետք է հատուկ թույլտվություն ունենան թերակղզի այցելելու համար։–0–