Ստանիսլավսկու ռուսական թատրոնը ընտրությունների մասին պրովոկացիոն բեմադրություն կներկայացնի

ԵՐԵՎԱՆ, 20 նոյեմբերի. /Նովոստի–Արմենիա/. Ստանիսլավսկու անվան ռուսական պետական դրամատիկական թատրոնը հունվարի վերջին թատերասերներին կներկայացնի ԱՄՆ Կոնգրեսի ընտրությունների մասին պատմող պրովոկացիոն պիեսի պրեմիերան, տեղեկացրեց թատրոնի գեղարվեստական ղեկավար Ալեքսանդր Գրիգորյանը։

«Հիմա մենք աշխատում ենք ընտրությունների մասն պատմող` Դ. Հայերի «Հրաժեշտ մարմնի հետ կամ Ելք կա» պիեսի վրա։ Եթե սյուժեի մասին խոսենք ավելի հակիրճ, ապա պիեսը պատմում է այն մասին, որ մահանում է ԱՄՆ–ի կոնգրեսի անդամն ու հարկավոր է նրան փոխարինող գտնել։ Սա միաժամանակ զվարճալի և ողբերգական պիես է այն մասին, որ կարելի է ցանկացած մարդու դարձնել պատգամավոր, իսկ քվեարկել կարելի է անգամ մահացածի օգտին», – ուրբաթ ասուլիսի ժամանակ ասաց Գրիգորյանը։

Նրա խոսքով` նոր մեկնաբանությամբ պիեսը կոչվելու է «Ընտրություն կա»։

«Սակայն ես մտածում եմ պիեսին ավելի պրովոկացիոն վերնագիր տալու շուրջ։ Պիեսում հանդես են գալիս Ֆրեդ Դավթյանը, Ռոբերտ Հակոբյանը, երիտասարդ դերասաններ։ Սա վառ պիես է` դերասանական վառ աշխատանքներով», – ասաց Գրիգորյանը։

Նա նաև տեղեկացրեց, որ Ամանորյա տոներին թատրոնը կներկայացնի Շառլ Պերոյի «Մոխրոտիկը» հեքիաթի ինտերպրետացիան` Նոռա Գրիգորյանի բեմադրությամբ, որի պրեմիերան տեղի կունենա դեկտեմբերի վերջին։–0–