Խաչատրյանական հնչյուններով ամփոփվել է Խաչատրյանի 4-րդ միջազգային փառատոնը
ԵՐԵՎԱՆ, 12 դեկտեմբերի. /Նովոստի–Արմենիա/. Շաբաթ օրն ամփոփվել է ՀՀ նախագահի հովանու ներքո անցկացվող Խաչատրյանի 4-րդ միջազգային փառատոնը։
Գալա համերգին ներկա էին ՀՀ նախագահի տիկին Ռիտա Սարգսյանը, մշակութային գործիչ, hայազգի անվանի երաժիշտ և նկարիչ, ռեժիսոր և պրոդյուսեր Ստաս Նամինը, հաղորդում է Հայաստանի պետական երիտասարդական նվագախմբի մամուլի ծառայությունը։
Ավելի քան երկու ամիս խաչատրյանական փառատոնի կազմակերպիչներն ու երաժիշտներն ունկնդրին են պարգևել կամերային, սիմֆոնիկ համերգներ, բալետային ներկայացումներ, մանկական ծրագրեր, անցկացվել են վարպետության դասեր։ Փառատոնի ընթացքում եղել են համաշխարհային և հայաստանյան բազմաթիվ պրեմիերաներ, և այս ամենը լեփ-լեցուն դահլիճներում և հանդիսատեսի ջերմ ծափահարությունների ներքո։
Փառատոնի փակման երեկոյի ընթացքում Հայաստանի պետական երիտասարդական նվագախումբը՝ Սերգեյ Սմբատյանի ղեկավարությամբ, կատարել է Խաչատրյանի ստեղծագործությունները՝ Սպարտակի և Ֆրիգայի ադաջոն «Սպարտակ» բալետից, Ջութակի կոնցերտը՝ մենակատար Հայկ Կազազյան և Երկրորդ սիմֆոնիան «Զանգով սիմֆոնիա»։
Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը, ամփոփելով Խաչատրյանի 4-րդ միջազգային փառատոնը, նկատել է, որ արձանագրել են բազմաթիվ հաջողություններ, և այդ հաջողությունները կնպաստեն, որպեսզի հաջորդ տարի էլ ավելի մեծ բովանդակություն հաղորդեն Խաչատրյանի 5-րդ միջազգային փառատոնին։
«Պրոֆեսիոնալ իմաստով ունենք շատ հետաքրքիր ծրագրեր, բացառիկ մենակատարներ։ Եվ իհարկե ինձ ու մեր մեծ թիմի համար կարևոր է, որ խաչատրյանական փառատոնը միավորում է նաև հայաստանյան լավագույն կոլեկտիվներին ու մենակատարներին», - ասել է Սմբատյանը։
Ջութակահար Հայկ Կազազյանն իր հերթին նշել է, որ միշտ հետևում է Խաչատրյանի փառատոնի ընթացքին և ուրախ է, որ բարձրակարգ մենակատարներ, դիրիժորներ են ժամանում Հայաստան՝ մասնակցելու երաժշտական այս տոնին։
Ըստ Հայկ Կազազյանի՝ վերջին տարիներին Հայաստանի երաժշտական կյանքի, փառատոների, համերգների մակարդակը շատ բարձրացել է, և դրա մեջ մեծ տեղ ունի հենց խաչատրյանական փառատոնը։
Մոսկվայում բնակվող Հայկ Կազազյանն ընդգծել է նաև, որ երևանյան բեմում առանձնահատուկ, ջերմ հույզերով է ելույթ ունենում։–0–
