ԵՐԵՎԱՆ, 1 նոյեմբերի. /Նովոստի–Արմենիա/. Հայաստանում մեկնարկել են ամերիկյան նոր միստիկ սերիալի նկարահանումները, որին մասնակցում են հայաստանցի, ամերիկացի և ռուս մասնագետներ, «Նովոստի–Արմենիա» գործակալությանը տեղեկացրեցին Academy Films ֆիլմարտադրող և պրոդյուսերական ընկերությունից։
Ինչպես նշվում է տարածված հաղորդագրության մեջ, ամերիկյան շուկայի համար նախատեսված միստիկ սերիալն առաջին անգամ է նկարահանվում Հայաստանում։ Նկարահանումներն իրականացնում են Academy Films ֆիլմարտադրող և պրոդյուսերական ընկերությունը` Associated Television International և Blitz Films ընկերությունների հետ համատեղ։
«Չարի հպումը» (Evil Touch) միստիկ սերիալը միջազգային նախագիծ է։ Ֆիլմի ռեժիսորը Սերգեյ Սարկիսովն է։ Գլխավոր պրոդյուսերը՝ Դեվիդ ՄկՔենզին։
Ֆիլմի իրադարձությունները ծավալվում են Հայաստանում։ Մի խումբ ամերիկացի ուսանողներ երկրով ճամփորդելիս պատահաբար հայտնվում են խուլ մի գյուղում, որը տարօրինակ և վտանգավոր է թվում նրանց։ Ստիպված լինելով գիշերել այնտեղ՝ նրանք շատ շուտով հասկանում են, որ նախնական կասկածներն ավելի քան հիմնավորված էին, քանի որ հենց այդ գյուղում է դարերով բանտարկված եղել Չար Ոգին։
Նկարահանումներին մասնակցում են ամերիկացի դերասաններ Ջենիֆեր Վիլը, Ջոի Նեսիվոչիան, Փերի Սթրոնգը, Կարմեն Հոջսոնը, Քրիս Սփարքսը, Մելորի Գոլդբերգը և Դենիել Քովինը։ Հայ դերասաններից սերիալում հանդես կգան Ալեքսանդր Խաչատրյանը, Արսեն Գրիգորյանը և այլք։
Նկարահանումները կշարունակվեն մինչև նոյեմբերի վերջը։ Դրանք անցկացվում են Գառնիում, Դաշտաշենում, Աշտարակում և Երևանում։–0–
