ԵՐԵՎԱՆ, 27 ապրիլի./Նովոստի–Արմենիա/. «Եվրատեսիլ 2017»–ում Հայաստանը ներկայացնող Արծվիկն աջակցել է ռուսաստանցի Յուլիա Սամոյլովային, ում արգելել են մասնակցել մրցույթին։
«Ես, որպես արտիստ, մտնում են նրա դրության մեջ։ Չէ՞ որ նա իմ նման հավատում էր իր երազանքին։ Եվ, իհարկե, ես կցանկանայի, որպեսզի նա այնտեղ ներկա լիներ։ Չէ՞ որ սա երաժշտական մրցույթ է, և մենք աշխարհին փոխանցում ենք երաժշտություն, բարություն, դրական լիցքեր։ Այդ պատճառով ինձ համար սա տհաճ իրավիճակ է։ Սակայն ես հույս ունեմ, որ հաջորդ տարի նա կմասնակցի մրցույթին և կիրականացնի իր երազանքը», – ասաց Արծվիկը։
Ուկրաինայի անվտանգության ծառայությունը մարտի 22–ին պաշտոնապես արգելել է Յուլիա Սամոյլովային մուտք գործել Ուկրաինա։ Կիևի հայտարարության համաձայն, Յուլիայի նկատմամբ կիրառված միջոցները կապված են այն հանգամանքի հետ, որ նա այցելել է Ղրիմ։ Ուկրաինան արգելում է իր տարածք մուտք գործել այն մարդկանց, ովքեր հրապարակային կերպով աջակցել են Ռուսաստանին Ղրիմի միացմանը և արտիստներին, ովքեր ելույթ են ունեցել թերակղզու տարածքում։
Արծվիկը նաև ընդգծեց, որ ինքը Ղրիմում երբեք չի եղել։
«Եվրատեսիլում» հայկական պատվիրակության ղեկավար Գոհար Գասպարյանն իր հերթին վստահեցրեց, որ Հայաստանին հաջողվեց խուսափել «Եվրատեսիլի» շուրջ առաջացած քաղաքական «աղմուկից»։
«Խնդիրը կապված է Ռուսաստանի և Ուկարինայի փոխհարաբերությունների հետ։ Եվ դա որևէ կապ չունի Հայաստանի ներկայացուցչի հետ։ Սակայն մենք նկատեցինք անհանգստություն մեր հայրենակիցների շրջանում։ Անհանգստության որևէ առիթ չկա», – ասաց նա։
Ուկրաինայում նախատեսված «Եվրատեսիլ 2017»–ին մասնակցում է 43 երկիր։ Մրցույթի կիսաեզրափակիչը կանցկացվի մայիսի 9–ին և 11–ին, իսկ եզրափակիչը` մայիսի 13–ին։ Արծվիկը ելույթ կունենա առաջին կիսաեզրափակչում 16 համարի ներքո։–0–