ՌԴ-ն ավելացնում է անբերքատվության հետևանքով տուժած Հայաստանին տրամադրվող հումանիտար օգնության ծավալները. ԱԻՆ

 ՌԴ արտակարգ իրավիճակների նախարարությունը, կառավարության կարգադրության համաձայն, սկսել է անբերքատվության հետևանքով տուժած Հայաստանի Հանրապետությանը պարենային օգնության ցուցաբերման հումանիտար գործողության երկրորդ փուլը, չորեքշաբթի «ՌԻԱ Նովոստիին» տեղեկացրել են գերատեսչությունից:

«Սարատովի մարզում գտնվող Կրասնի Կուտ կայարանում սկսվել է 5 հազար տոննա ցորենի հացահատիկի բեռնումը, որը կուղարկվի Հայաստան՝ Դալարիկ կայարան», - ասել է գործակալության զրուցակիցը:

Նա հիշեցրել է, որ հումանիտար գործողության առաջին փուլը մեկնարկել էր սեպտեմբերի 6-ին: Հայաստանի Հրազդան կայարան է արդեն ժամանել 18 վագոն, որոնք բեռնված են 818 տոննա ռաֆինացված արևածաղկի ձեթով, նույն ապրանքով ևս չորս վագոն (182 տոննա) այժմ ճանապարհին է:

ԱԻՆ-ի տվյալների համաձայն՝ նախորդ շաբաթ ռուսական հումանիտար օգնություն են ստացել նաև Ղրղզստանն ու Հարավային Օսեթիան: Մասնավորապես, Ռյազանից Ղրղզստան է ուղարկվել անկողնային սպիտակեղենով (50 հազար կոմպլեկտ), կիսաբրդյա վերմակներով (40 հազար կոմպլեկտ), սննդամթերով (316.3 տոննա), ինչպես նաև «Պամիր 30» տեսակի 30 վրաններով բեռնված18 երկաթուղային վագոն:-0-