Հայ կազակները կմասնակցեն Կրասնոդարի երկրամասի Չամլիկյան հիշատակի արարողությանը

Հայ կազակության ներկայացուցիչները կմասնակցեն Չամլիկյան հիշատակի արարողությանը, որը կանցկացվի հունիսի 5-6-ը Չամլիկիա ավանում (Լաբինսկի գծի` 1841 թվականին կառուցված ավաններից մեկը):

Չամլիկիյան հիշատակի արարողությունն անցկացվում է 1918 թվականի ապստամբության ժամանակ զոհված Չամլիկյան ավանի կազակների հիշատակին: Ապստամբությունը սկսվել է հունիսի 5-ին` Սուրբ Երրորդության տոնի նախաշեմին, ինչի առիթով այն ստացել է Երրորդության (Տրոիցկի) անունը: Բոլշևիկյան զորքերի կողմից ապստամբության ճնշման ընթացքում սպանվել է 913 կազակ:

Ինչպես «Նովոստի-Արմենիա» գործակալությանը հայտնեցին Բարեկամության և համագործակցության հայ-կազակական միջազգային միավորման տեղեկատվական կենտրոնից, պատվիրակությունը Կազմակերպության նախագահ, կազակ գեներալ-լեյտենենտ Կարապետ Զադոյանի գլխավորությամբ ուրբաթ մեկնել է ՌԴ Հարավային Դաշնային օկրուգի Կրասնոդարի երկրամասի Լաբինսկի շրջան` Կուբանի կազակական զորքի ատաման, Կրասնոդարի երկրամասի ադմինստրացիայի ղեկավարի տեղակալ Նիկոլայ Դոլուդայի հրավերով:

«Որոնողական աշխատանքը, որն իրականացվում է Կուբանի կազակական զորքի Լաբինսկի բաժնի ատաման Վիկտոր Կալինենկոյի նախձեռնությամբ, արժանի է ամենաբարի խոսքերի»,- ասաց Զադոյանը:

Ըստ նրա, այդ աշխատանքը թույլ տվեց ժողովրդի հիշողության մեջ արթնացնել պատմության ողբերգական էջերը, որոնք մինչև վերջին ժամանակները գործնականում անհայտ էին: «Մենք գնահատում ենք այդ ջանքերը: Ինչպես և գնահատում ենք մեր եղբայրական կապերը Կուբանի կազակության հետ»,- ասաց նա:

Չամլիկյան հիշատակի առաջին արարողության ժամանակ, որոնք անցկացվեցին 2009 թվականի հունիսի 6-ին, զոհված կազակների հուղարկավորման վայրում տեղադրվեց ոսկեզօծ խաչ: -0-