Ղրղզստանի նախագահական ընտրությունները կանցկացվեն կես տարուց. Օտունբաևա

ԵՐԵՎԱՆ, 8 ապրիլի. /Նովոստի-Արմենիա/. Ղրղզստանի նախագահական ընտրությունները կանցկացվեն վեց ամսից, հինգշաբթի լրագրողներին հայտարարել է Ղրղզստանի ժողովրդական վստահության կառավարության ղեկավար Ռոզա Օտունբաևան, հաղորդում է «ՌԻԱ Նովոստին»՝ հղում անելով Ֆրանս Փրես գործակալությանը:

«Իշխանությունը ժամանակավոր կառավարության վերահսկողության տակ է գտնվում: Կառավարման նման համակարգը կգործի երկրում վեց ամսվա ընթացքում նոր սահմանադրության պատրաստման և ժողովրդավարական բոլոր նորմերին համապատասխան նախագահական ընտրությունների կազմակերպման համար»,- ասաց Օտունբաևան:

Ղրղզստանի տարբեր քաղաքներում անկարգությունները շարունակում են արդեն երեք օր: Բախումների զոհ է դարձել 74 մարդ, 500-ից ավելին վիրավոր է: Ընդդիմության կողմից ստեղծված ժամանակավոր կառավարությունը հինգշաբթի հայտարարել է, որ արձակում է խորհրդարանն ու իր վրա է վերցնում նախագահի և նախարարների կաբինետի գործառույթները:

Ժամանակավոր կառավարությունը մտադիր է գործել կես տարվա ընթացքում՝ մինչև Սահմանադրության մեջ փոփոխություններ մտցնելը: Ընդդիմության ներկայացուցիչները հայտարարում են, որ իրենց կողմն են անցել միլիցիան, բանակն ու սահմանապահ ծառայությունները:

Ղրղզստանի նախագահ Կուրմանբեկ Բակիևը հեռացել է մայրաքաղաքից բողոքի զանգվածային ակցիաներից հետո և ընդդիմության տվյալների համաձայն՝ գտնվում է Ջալալաբադում, որտեղ իբրև թե փորձում է հակագրոհ կազմակերպել: Նախագահը դեռ որևէ հայտարարությամբ հանդես չի եկել:

Զանգվածային դժգոհությունների առիթ է դարձել այն, որ իշխանություններն արգելել են անցկացնել ժողովրդական հավաք և երեքշաբթի երեկոյան ձերբակալել են ընդդիմության առաջնորդներին:-0-