Եթե Վրաստանը ցանկանա, կրկին կընդգրկեն ԱՊՀ կազմում, ուրբաթ Մինսկում հայտարարեց Համագործակցության գործադիր կոմիտեի նախագահ Սերգեյ Լեբեդևը։
ԱՊՀ կազմից Վրաստանի դուրս գալու պաշտոնական ընթացակարգն ավարտվեց երեքշաբթի՝ 2009 թվականի օգոստոսի 18-ին։
«Այն դեպքում, եթե Վրաստանն ԱՊՀ վերադառնալու որոշում ընդունի, նրան կընդունեն»,- լրագրողներին հայտնեց Լեբեդևը, տեղեկացնում է ՌԻԱ Նովոստին։
«Վրաստանի դուրս գալն ազդել է Համագործակցության շրջանակներում ստեղծված իրավիճակի վրա, առավել ևս, երբ Վրաստանը շարունակում է մասնակցել ավելի քան 70 համաձայնագրի»,- նշեց ԱՊՀ Գործադիր կոմիտեի ղեկավարը։
Միաժամանակ նա ընդգծեց, որ Վրաստանի դուրս գալը Համագործակցությունից չի համապատասխանում ոչ վրաց ժողովրդի շահերին, ոչ այդ երկրի տնտեսությանը։
Զրույցի ընթացքում անդրադարձ կատարվեց նաև ԱՊՀ նոր անդամ-երկրների՝ Աբխազիայի և Հարավային Օսեթիայի ի հայտ գալու հնարավորությանը վերաբերող հարցին։ ԱՊՀ գործադիր կոմիտեում պարզաբանեցին, որ Հարավային Օսեթիայի և Աբխազիայի՝ Համագործակցությանը միանալու համար անհրաժեշտ է այդ երկրների անկախության ճանաչումը ԱՊՀ բոլոր երկրների կողմից, ինչպես նաև նրանց համաձայնությունը Հարավային Օսեթիայի և Աբխազիայի՝ ԱՊՀ կազմում ընդունելու վերաբերյալ։
2008 թվականի օգոստոսի 14-ին Վրաստանի կառավարությունը որոշում ընդունեց Վրաստանի նկատմամբ «Անկախ Պետությունների Համագործակցության ստեղծման մասին Համաձայնագրի» գործունեության դադարեցման մասին։ 2008 թվականի օգոստոսի 18-ին Վրաստանի ԱԳՆ-ը ԱՊՀ Գործադիր կոմիտեին նոտա ուղղեց, որում տեղեկացվում էր ԱՊՀ կազմից Վրաստանի դուրս գալու մասին։ ԱՊՀ Կանոնադրության համաձայն, ԱՊՀ անդամակցությունը դադարեցվում է գրավոր իրազեկումից 12 ամիս հետո։ -0-
