ՀԱՊԿ անդամները Ղրղզստանում անցկացվող գագաթնաժողովի ժամանակ կքննարկեն տարածաշրջանային անվտանգությունը. Բորդյուժա

ՀԱՊԿ անդամ-պետությունների ղեկավարների ոչ պաշտոնական հանդիպման ժամանակ, որը կանցկացվի հուլիսի 31-1-ը, մտքեր կփոխանակվեն տարածաշրջանային անվտանգության ապահովմանն ու տեղեկատվական քաղաքականության համակարգմանն ուղղված ՀԱՊԿ գործողությունների հարցի շուրջ, լրագրողներին տեղեկացրել է ՀԱՊԿ գլխավոր քարտուղար Նիկոլայ Բորդյուժան, հաղորդում է «ՌԻԱ Նովոստին»:

Նրա կարծիքով՝ պետությունների ղեկավարները կմշակեն քննարկվող հարցերի նկատմամբ համատեղ մոտեցումներ և կտան համապատասխան հանձնարարականներ:

Բորդյուժան նշել է, որ կարծիքների փոխանակման ընթացքում արագ արձագանքման ուժերի խնդիրը կքննարկվի, սակայն ոչ մանրամասն, քանի որ «դեռևս անհրաժեշտ է իրականացնել և առաջին հերթին վավերացնել արագ արձագանքման ուժերի ստեղծման հետ կապված բոլոր խնդիների շուրջ ձեռք բերված համաձայնագրերը»:

Պատասխանելով այն հարցին, թե կքննարկվի՞, արդյոք, Ղրղզստանի Օշ քաղաքում արագ արձագանքման ուժերի բազայի ստեղծման խնդիրը՝ Բորդյուժան ընդգծել է, որ «այդ հարցը քննարկման չի ներկայացվել, սակայն ամեն ինչ, վերջիվերջո, կախված է ՀԱՊԿ անդամ-պետությունների ղեկավարների ցանկությունից»:

Ոչ պաշտոնական հանդիպմանը կմասնակցեն Հայաստանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի նախագահները:-0-