Ռուսաստանը թայմ-աութ է վերցնում ռուսական շուկա բելառուսական կաթնամթերքի մատակարարման հարցի շուրջ Բելառուսի հետ բանակցություններում` Մինսկի դիրքորոշումը ճշտելու նպատակով, երեքշաբթի «ՌԻԱ Նովոստին» է տեղեկացրել ՌԴ սպառողների իրավունքների պաշտպանության և մարդու բարեկեցության ոլորտի վերահսկողության դաշնային ծառայության պետ (Ռոսպոտրեբնադզոր), ՌԴ գլխավոր պետական սանիտարական բժիշկ Գենադի Օնիշչենկոն:
«Բելառուսի պաշտոնատար անձանց հրապարակային մեկնաբանությունները, որոնք մենք ստացանք այդ երկրի մամուլից, ինչպես նաև պաշտոնական ԶԼՄ-ների` օրինակ` «Սովետսկայա Բելառուսիայի» մեկնաբանություններն ինձ բոլոր հիմքերն են տալիս կասկածելու, որ Մոսկվայում գտնվող Մինսկի պատվիրակության հետ ձեռք բերած պայմանավորվածությունները համընկնում են Բելառուսի պաշտոնատար անձանց դիրքորոշման հետ: Նրանց և մեր ժամանակը զուր չվատնելու համար մենք դիրքորոշումները ճշտելու համար թայմ-աութ ենք վերցնում, և կախված բելառուսների պարզաբանումների արդյունքներից՝ մենք կորոշենք՝ շարունակելու՞ ենք մեր աշխատանքը, թե ոչ», - ասել է Օնիշչենկոն:
Նա դժվարացել է խոսել բանակցությունների վերսկսման հնարավոր ժամկետների մասին: «Չեմ կարող ասել, թե որքան կտևի այս թայմ-աութը», - ասել է Օնիշչենկոն: Ռուսաստանի կարգավորիչն արգելել է Բելառուսից ՌԴ ներմուծել կաթնամթերքի լայն շրջանակ՝ կաթի վերաբերյալ տեխնիկական կանոնակարգի պահանջների համաձայն Բելառուսի կողմից փաստաթղթերի վերաձևակերպումը չկատարելու պատճառով:
Նախօրեին Օնիշչենկոն նշել էր, որ բելառուսական կաթնամթերքը ռուսական շուկա վերադարձնելու համար «զգալի ժամանակ» կպահանջվի:-0-
