Ռուսաստանի հինգերրորդ գումարման պետդումայի առաջին նիստը, որին դեկտեմբերյան ընտրությունների արդյունքներով անցել է չորս կուսակցություն, տեղի կունենա երկուշաբթի։
Ժամկետից շուտ խորհրդարանի ստորին պալատը ժողովի է հրավիրել ՌԴ նախագահ Վլադիմիր Պուտինը, որն ավելի վաղ հայտարարում էր, որ նոր գումարման Պետդուման կսկսի նիստը սահմանված ժամկետից շուտ։ Ըստ օրենքի՝ նոր գումարման պատգամավորները պետք է իրենց առաջին ժողովին հավաքվեն ընտրությունների օրվանից տասներեք օր անց՝ այսինքն հունվարի 1-ին, որը տասնօրյա ամանորյա արձակուրդների մեջ է մտնում (դեկտեմբերի 30-ից մինչև հունվարի 8-ը)։
Պուտինը երկրորդ անգամ օգտագործեց իր իրավունքը՝ հայտարարելու պատգամավորների ժամկետից շուտ հավաքը։ Մեկամսյա արձակուրդ չէին ունեցել նաև չորրորդ գումարման պատգամավորները՝ 2003 թ.-ի դեկտեմբերի 7-ի ընտրություններից հետո նրանք հավաքվել էին դեկտեմբերի 29-ին։
2007 թ.-ի դեկտեմբերի 2-ին տեղի ունեցած ընտրությունների արդյունքներով՝ «Յեդինայա Ռոսիա» նախագահամետ կուսակցությունը ստացավ սահմանադրական մեծամասնություն՝ ստորին պալատում 315 տեղ (ձայների 64,30 տոկոսը)։ Կոմունիստները ունեն 57 մանդատ (11,57 տոկոս), Ռուսաստանի լիբերալ-դեմոկրատական կուսակցությունը՝ 40 մանդատ (8,14 տոկոս) և «Սպրավեդլիվայա Ռոսիան»՝ 38 մանդատ (7,74 տոկոս)։-0-
