Պուտինը կարող է Ռուսաստանի առաջնորդը լինել՝ նախագահական երկրորդ ժամկետի ավարտից հետո ևս. Time

Time ամսագիրը ցանկացել է ցույց տալ, որ Ռուսաստանի նախագահ Վլադիմիր Պուտինը կմնա երկրի առաջնորդ՝ անգամ 2008 թ.-ից հետո, ԱՄՆ Ազգային հանրային ռադիոյի եթերում հայտարարել է Time-ի գլխավոր խմբագրի տեղակալ Էդի Իգնեյշեսը։

Ուրբաթ լույս է տեսել ամերիկյան ազդեցիկ ամսագրի համարը, որում Պուտինը անվանված է «տարվա մարդ»։ Ամսագիրը, որի շապիկի վրա ՌԴ նախագահի նկարն է,  տպագրվել է մոտ 50 միլիոն օրինակով, հաղորդում է «ՌԻԱ Նովոստին»։

«Այս տարի նրա կուսակցությունը («Յեդինայա Ռոսիան») հաղթել է որոշիչ (խորհրդարանական) ընտրություններում, և նա...ստեղծել է մեխանիզմ, որպեսզի դառնա Ռուսաստանի գերագույն առաջնորդ այն բանից հետո, երբ նրա երկրորդ և վերջին նախագահական ժամկետն ավարտվի հաջորդ տարի», - ասել է Իգնեյշեսը։

«Երևում է, որ այդ պաշտոնը կլինի վարչապետի պաշտոնը, սակայն դա կարևոր չէ։ Նա (Պուտինը) ակնհայտորեն կլինի գերագույն առաջնորդ՝ գուցե՝ ցմահ, և հենց դա ենք մենք այստեղ ընդունում», - նշել է Time-ի գլխավոր խմագրի տեղակալը։-0-