ԵՐԵՎԱՆ, 17 դեկտեմբերի. /Նովոստի-Արմենիա/. Երկուշաբթի Մոսկվայում կկայանա «Յեդինայա Ռոսիա» կուսակցության համագումարը, որը պաշտոնապես կառաջադրի ՌԴ առաջին փոխվարչապետ Դմիտրի Մեդվեդևին՝ որպես նախագահի թեկնածու։
Մեդվեդևի թեկնածությունն առաջարկել են «Յեդինայա Ռոսիայի», «Սպրավեդլիվայա Ռոսիայի», Ռուսաստանի Ագրարային և «Գրաժդանսկայա Սիլա» կուսակցությունների առաջնորդները՝ դեկտեմբերի 10-ին ՌԴ նախագահ Վլադիմիր Պուտինի հետ ունեցած հանդիպման ժամանակ։ Նախագահն, իր հերթին, այդ թեկնածությանը հավանություն է տվել, հաղորդում է «ՌԻԱ Նովոստին»։
Խորհրդակցությանը մասնակցած կուսակցություններից խորհրարան են անցել միայն «Յեդինայա Ռոսիան», որը ստացել է սահմանադրական մեծամասնությունը և «Սպրավեդլիվայա Ռոսիան»։ «Յեդինայա Ռոսիայի» անդամները Մեդվեդևի թեկնածության վերաբերյալ խորհրդակցությանը մյուս երեք կուսակցություններին հրավիրելու փաստը բացատրել են «քաղաքական լայն ուժերի վրա հենվելու» իրենց ցանկությամբ։
Համագումարին որոշվելու են նաև մի շարք այլ հարցեր։ Մասնավորապես, համագումարը կառաջադրի կուսակցության առաջնորդ, չորրորդ գումարման Պետդումայի խոսնակ Բորիս Գռիզլովի թեկնածությունը՝ նոր Պետդումայի խոսնակի պաշտոնում։ Գռիզլովը նաև կգլխավորի կուսակցության խմբակցությունը Դումայում։
Նախընտրական արշավի արդյունքների և կուսակցության խնդիրների մասին հիմնական զեկույցով հանդես կգա կուսակցության առաջնորդը։ Համագումարի աշխատանքին կմասնակցի 2 հազ. մարդ, այդ թվում՝ 529 պատվիրակ։
Միջոցառման աշխատանքները լուսաբանելու համար հավատարմագրվել է շուրջ 700 լրագրող, որոնք ներկայացնում են 200 արտասահմանյան, 250 մարզային և ավելի քան 200 դաշնային լրատվամիջոցներ։
ՌԴ նախագահի ընտրությունները տեղի կունենան 2008 թ. մարտի 2-ին։-0-
