Փաշինյանը թարմացրել է թավշյա հեղափոխության «ճանապարհային քարտեզը»

ԵՐԵՎԱՆ, 21 ապրիլի. /Նովոստի–Արմենիա/. «Ելք» ընդդիմադիր խմբակցության առաջնորդ, «Քաղաքացիական պայմանագիր» կուսակցության ղեկավար Նիկոլ Փաշինյանն ուրբաթ ներկայացրեց Հայաստանում թավշյա հեղափոխության թարմացված «ճանապարհային քարտեզը»:

«Սերժ Սարգսյանը պետք է հրաժարվի վարչապետի պաշտոնից: Խորհրդարանը պետք է նոր վարչապետ ընտրի, ում թեկնածությունը կառաջարկի ժողովուրդը: Կստեղծվի ժամանակավոր կառավարություն: Եթե խորհրդարանը չընդունի նոր կառավարության ծրագիրը, այն կլուծարվի, և կնշանակվեն նոր արտահերթ ընտրություններ»,- ասաց Փաշինյանը:

Նա հայտարարեց Հայաստանի հանրապետական կուսակցության հետ վերոնշյալ կետերը քննարկելու պատրաստակամության մասին, որ ապահովվի իշխանության խաղաղ անցումը ժողովրդին:

Նրա խոսքով, ընդդիմության անցկացրած խաղաղ միջոցառումների հանգեցրին նրան, որ իշխանություններն արդեն մի քանի օր է` հայտարարում են երկխոսության պատրաստակամության մասին:

«Մենք իշխանությունների հետ երկխոսությունը պահում ենք հանրահավաքների միջոցով»,- ասաց Փաշինյանը:

Նա նշեց, որ միայն ապրիլի 20-ին բողոքի ակցիաների մասնակիցներն անցել են 25 կիլոմետր, իսկ բերման ենթարկվածների թիվը գերազանցել է 300-ը:

«Ռեպրեսիվ գործողություններով իշխանություններն էլ ավելի են գրգռում ժողովրդի դժգոհությունը»,- ասաց նա, ընդգծելով, որ անձամբ ինքը քաղաքական դիմակայության սրում և ավելի լուրջ կոնֆլիկտի բռնկում չի ցանկանում: -0-