Նալբանդյան. Երևանը կարևորում է վրացական կողմի օժանդակությունը ԵԱՀԿ ՄԽ–ի ջանքերին

ԵՐԵՎԱՆ, 25 մարտի. /Նովոստի–Արմենիա/. Հայկական կողմը կարևորում է վրացական կողմի օժանդակությունը ԵԱՀԿ Մինսկի խմբի ջանքերին ղարաբաղյան հակամարտության` բացառապես խաղաղ կարգավորման գործում, ուրբաթ ասաց Հայաստանի ԱԳՆ ղեկավար Էդվարդ Նալբանդյանն իր վրացի գործընկեր Միխեիլ Ջանելիձեի հետ ճեպազրույցում։

Նա ասաց, որ տեղեկացրել է Վրաստանի ԱԳ նախարարին ղարաբաղյան խնդրի շուրջ ստեղծված իրավիճակի մասին, ընդգծելով, որ ԵԱՀԿ ՄԽ–ն միջոնրդության միակ միջազգային ձևաչափն է։

Ջանելիձեն իր հերթին նշեց, որ Նալբանդյանի հետ հանդիպման ընթացքում քննարկվել են տարածաշրջանային հակամարտությունները։

«Վրաստանը կողմ է հանդես գալիս տարածաշրջանային բոլոր հակամարտությունների բացառապես խաղաղ կարգավորումներին»,– ասաց նա։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-