Կեղծ և ժամկետանց դեղերի ոչնչացման գործընթացը կկանոնակարգվի. նախագիծ
ԵՐԵՎԱՆ, 15 հունիսի․/Նովոստի–Արմենիա/․ Առաջարկվում է կանոնակարգել կեղծ և ժամկետանց դեղերի ոչնչացման գործընթացը։
«Վերահսկողական գործիքակազմի բացակայությունը տեսչական մարմնին հնարավորություն չի տալիս հավաստիանալու՝ դեղերն իսկապես ոչնչացվո՞ւմ են, թե՞ ոչ, իսկ երբեմն էլ դրանք ոչնչացվում են փաստաթղթային տեսքով, սակայն իրականում պահպանվում են եւ իրացվում շուկայում», - ասաց Առողջապահության հարցերի մշտական հանձնաժողովի նախագահ Վանիկ Օհանյանը` առաջին ընթերցմամբ ներկայացնելով իր և Լուսինե Բադալյանի հեղինակած՝ ««Դեղերի մասին» օրենքում լրացումներ և փոփոխություն կատարելու մասին» և կից օրենքի նախագծերի փաթեթը:
Նրա խոսքով՝ նախագծի նպատական է կանոնակարգել կեղծ և ժամկետանց դեղերի ոչնչացման գործընթացն ու պատշաճ վերահսկողություն սահմանել ոչնչացման գործընթացի նկատմամբ:
Օհանյանը նշեց, որ նախագծում կլրացվի դրույթ առ այն, որ դեղերի ոչնչացումն իրականացնող լիցենզավորված իրավաբանական անձը կամ ԱՁ-ն պատասխանատու է դրոշմանիշի, դրոշմապիտակի մարումն ապահովելու համար, իսկ դրա կիրառության հետ կապված հարցերը կկանոնակարգվեն համապատասխան ենթաօրենսդրական ակտերի մշակման ժամանակ:
Նա նաև հայտնեց, որ նախագծերի փաթեթը բավականաչափ քննարկվել է Առողջապահության նախարարության, Շրջակա միջավայրի նախարարության ու Աշխատանքի և առողջապահության տեսչական մարմնի գործընկերների հետ, և առկա են վերջիններիս դրական կարծիքները:
