Իշխան Սաղաթելյանի բնակարանում և ավտոմեքենաներում խուզարկություն է կատարվում
ԵՐԵՎԱՆ, 23 հունիսի․/Նովոստի–Արմենիա/․ «Հայաստան» ընդդիմադիր խմբակցության անդամ, ՀՅԴ ՀԳՄ ներկայացուցիչ Իշխան Սաղաթելյանի բնակարանում և ավտոմեքենաներում խուզարկություն է կատարվում:
Այս մասին «Նովոստի–Արմենիա» գործակալությանը հայտնեց ՔԿ մամուլի քարտուղար Կիմա Ավդալյանը։
«Քրեական վարույթի շրջանակում կատարվում են քննչական և վարութային գործողություններ», – նշեց Ավդալյանը։
Սաղաթելյանը լրագրողների հետ զրույցում հայտարարել է, որ խուզարկություններն իրականացվում են Հարկադիր կատարումն ապահովող ծառայության պահանջները չկատարելու հետ կապված «ինչ-որ քրեական վարույթի շրջանակում»։
«Բավականին մեծ թվով ուժայիններ շրջափակել են ամբողջ շենքը, այս ամենը ծիծաղ է առաջացնում։ Բռնագանձել են տանը եղած զարդերը, որոշակի քանակությամբ կանխիկ գումար», – նշել է Սաղաթելյանը։
Նա տեղի ունեցածն անվանել է «հերթական հալածանք և հերթական ապօրինի գործընթաց վերջին յոթ տարիների ընթացքում»՝ հայտարարելով, որ պատրաստ է ցանկացած սցենարի։
