Հայաստանը երկրորդ հնարավորությունը կտա զինվորական ծառայություն չանցած անձանց

ԵՐԵՎԱՆ, 30 մարտի. /Նովոստի-Արմենիա/. Հայաստանի կառավարությունը հինգշաբթի նիստում հավանություն է տվել Սփյուռքի նախարարության առաջարկին Հայաստանում զինվորական ծառայություն չանցած քաղաքացիներին քրեական պատասխանատվությունից ազատելու օրենքի ժամկետի երկարաձգման վերաբերյալ։

Հայաստանի կառավարությունն ամեն տարի կառավարության առաջարկով փոփոխություններ է կատարում «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» Հայաստանի Հանրապետության օրենքում, որոնցով առաջարկվում է քրեական պատասխանատվությունից ազատել զինվորական ծառայություն չանցած քաղաքացիների որոշ կատեգորիայի։

«Փոփոխություններով նախատեսվում է քրեական հետապնդումից ազատել զինվորական ծառայություն չանցած այն քաղաքացիներին, ում 27 տարին է լրացել մինչև 2015 թվականի մայիսի 1–ը»,– ասվում է կառավարության որոշման մեջ։

Վերջին երկու տարիներին նմանատիպ օրինագիծ չի ներկայացվել, ինչի հետևանքով ծառայություն չանցած հազարավոր քաղաքացիներ անորոշության վիճակում են եղել։
Պաշտպանության նախարար Վիգեն Սարգսյանը հայտարարել է, որ դեմ է ծառայություն չանցած քաղաքացիներին քրեական պատասխանատվությունից ազատելուն, բայց պատրաստ է երկարացնել օրենքի գործողությունը։

Սփյուռքի նախարարության տվյալներով, 2014 թվականին որոշակի գումար վճարելու և իր վրայից ծառայություն չանցնելու համար քրեական պատասխանատվությունը հանելու օրինական հնարավորությունից օգտվել է 954 մարդ, իսկ 2015 թվականի առաջին եռամսյակում` 61 մարդ։

Օրենքի գործողությունը բազմիցս երկարացվել է, ինչը տարեկան
թույլ է տալիս 27 տարեկանից բարձր մոտ 900 երիտասարդների այդ կերպ կատարել պարտքը Հայրենիքի նկատմամբ, ինչի հաշվին հատուկ պետական հաշվեհամարին մուտքերը կազմել են 800 մլն դրամ (1,6 մլն դոլար)։

Օրենքի գործողության տակ ընկնող ոչ բոլոր անձինք են օրինախախտներ, քանի որ շատերը բացակայում են երկրից այս կամ այն պատճառով, այդ թվում նրանք, ովքեր դեռ մանուկ տարիներին ծնողների հետ լքել են երկիրը և երկար ժամանակ գտնվել են արտերկրում։

Օրենքի համաձայն, պարտադիր զինվորական ծառայություն չանցած քաղաքացիները, զորակոչի չներկայանալու պահից և մինչև 27 տարին լրանալը կամ մինչև սահմանված կարգով պարտադիր զինվորական ծառայությունից ազատվելու կամ տարկետման հիմքեր ստանալը տուգանք են վճարում յուրաքանչյուր բաց թողած զորակոչի համար։

Տուգանքի առավելագույն չափը կազմում է 1.8 մլն դրամ (3,7 հազար դոլար)։ -0-