Հայաստանում կողոպտել են հարկային տեսչություններից մեկի նախկին ղեկավարին

ԵՐԵՎԱՆ, 8 նոյեմբերի. /Նովոստի-Արմենիա/. Երեքշաբթի վաղ առավոտյան զինված դիմակավորված անձինք կողոպտել են Հայաստանի հարկային տեսչություններից մեկի նախկին պետին, հաղորդում է shamshyan.com կայքը:

Միջադեպը տեղի է ունեցել Եղվարդ քաղաքում: Ինչպես հաղորդում է կայքը, ժամը 03։30-ի սահմանում 3 դիմակավորված անձինք ներխուժել են Եղվարդ քաղաքի Արարատյան 2 հասցեի տուն, որից հետո տանտիրոջ՝ 42-ամյա Արա Ստեփանյանի, կնոջ, 3 անչափահաս երեխաների և մոր նկատմամբ բռնություն են կիրառել։

«Դիմակավորված անձինք ներս են մտել երկհարկանի շենքի առաջին հարկի հյուրասենյակից, որտեղ մահակներով ծեծել են Ա. Ստեփանյանին, այնուհետև հրազենի սպառնալիքով պահանջել ոսկյա, արծաթյա զարդեր, գումար, որից հետո, իրենց ավարը ստանալով, դիմել են փախուստի», - նշվում է հաղորդագրության մեջ։

Փաստի առթիվ հարուցվել է քրեական գործ՝ ՀՀ ՔՕ-ի 175 հոդվածի 2-րդ մասի հատկանիշով (Ավազակություն, որը կատարվել է մի խումբ անձանց կողմից նախնական համաձայնությամբ)։ Կայքի տվյալներով, Ա. Ստեփանյանը, ով հարձակումից հետո տեղափոխվել է հիվանդանոց, նախկինում աշխատել է որպես Արմավիրի հարկային տեսչության պետ, այժմ էլ աշխատում է Հարկադիր կատարման ծառայությունում, իսկ Եղվարդ քաղաքում ունի սեփական՝ «Պանդա» անունով սուպերմարկետներ։ -0-