Հայաստանում դեղորայքի մեծ մասը կվաճառվի բաղադրատոմսով. ՀՀ ԱՆ

ԵՐԵՎԱՆ, 12 մայիսի. /Նովոստի-Արմենիա/. Հայաստանում դեղորայքի մեծ մասը կվաճառվի բաղադրատոմսով, հինգշաբթի լրագրողներին ասաց ՀՀ առողջապահության նախարար Արմեն Մուրադյանը:

Նույն օրն Ազգային ժողովի արտահերթ նիստում երկրորդ ընթերցմամբ ընդունվեց «Դեղորայքի մասին» օրենքը և ուղեկցող օրենքների փաթեթը, որոնք նախատեսում են խստորեն վերահսկել ողջ գործընթացը` դեղորայքի արտադրությունից մինչև դրանց իրացումը:

«Ամբողջ քաղաքակիրթ աշխարհում դեղորայքի վաճառքն իրականացվում է հենց այս մեթոդով: Դեղորայքի չկարգավորվող սպառումը վնասակար է առողջության համար», - ասաց Մուրադյանը:

Նրա խոսքով, նոր օրենքը նախատեսում է խստացնել առանց բաղադրատոմսի դեղորայքի վաճառքի պատասխանատվությունը: Օրենքում առաջ են քաշվել նոր պահանջներ նաև պահպանման պայմանների, դեղամիջոցների շրջանառության, դրանց որակի վերահսկման, գնագոյացման վերաբերյալ: Փոփոխություննրը վերաբերում են ինչպես ներկրողներին, այնպես էլ դեղորայքի արտադրողներին: -0-