Հայաստանի ոստիկանությունը կոչ է անում քաղաքացիական հասարակությանն օգնել ընտրակաշառքների դեմ պայքարում

ԵՐԵՎԱՆ, 2 փետրվարի. /Նովոստի–Արմենիա/. Նախընտրական կաշառքների դեմ հնարավոր է պայքարել միայն հասարակության ակտիվ մասնակցությամբ և օժանդակությամբ, հինգշաբթի ասաց Հայաստանի ոստիկանության շտաբի պետ Հովհաննես Քոչարյանը։

«Հակառակ դեպքում այդ խնդիրը լուծում չի ստանա։ Ոստիկանությունը պատասխանատվություն է կրում առաջին հերթին, բայց, այնուամենայնիվ, այդ հանցատեսակը նրբություններ ունի` հաշվի առնելով դրա գաղտնի լինելը։ Ոստիկանության հնարավորությունները չարժե թերագնահատել, անշուշտ, մենք ունենք հատուկ միջոցներ և հաստիք այդ ուղղությամբ արդյունավետ աշխատանքի համար, բայց հասարակության օժանդակությունը վճռորոշ գործոն է մնում»,– ասաց Քոչարյանը հատուկ մեթոդական ձեռնարկի նախագծի հանրային քննարկումների ընթացքում։

Ըստ նրա, նման նախաձեռնության նպատակը քաղաքացիական հասարակության հետ գործակցության վստահելի մթնոլորտի ապահովումն է, ինչի համար, նախևառաջ, պետք է ճիշտ ներկայացնել ոստիկանների լիազորությունների շրջանակը։

«Այս ձեռնարկը, ըստ էության, նոր չէ, քանի որ յուրաքանչյուր ընտրություններից առաջ ոստիկանությունը հրապարակել է նմանատիպ փաստաթղթեր։ Սրանք ցուցումներ են ոստիկանների համար, բայց քանի որ մենք ունենք Ընտրական նոր օրենսգիրք, ապա ստիպված ենք փոխել մի քանի կետեր։ Մենք պատրաստ ենք առաջարկություններ լսելու»,– ասաց Քոչարյանը։

Հելսինկիի քաղաքացիական ասամբլեայի Վանաձորի գրասենյակի ղեկավար Արթուր Սաքունցն իր հերթին առաջարկեց հստակեցնել փաստաթղթում ոստիկանության աշխատողների գործունեությունը ոչ միայն ընտրությունների օրը, այլ նաև նախընտրական ժամանակահատվածում և նշել քրեորեն պատժելի արարքները։ Մասնավորապես, նրա խոսքով, խոսքն ընտրակաշառքների մասին է։

Խորհրդարանական ընտրությունները Հայաստանում կանցկացվեն ապրիլի 2–ին։ -0-