Հայ կոմպոզիտորների ստեղծագործությունները կհնչեն ապրիլին կայանալիք փառատոնում

ԵՐԵՎԱՆ, 21 դեկտեմբերի. /Նովոստի–Արմենիա/. Հայ կոմպոզիտորների տարբեր ժանրերի ստեղծագործությունները կհնչեն Հայաստանում հաջորդ տարվա ապրիլին ծրագրված մեծ փառատոնում, երկուշաբթի լրագրողներին ասաց Հայաստանի կոմպոզիտորների միության ղեկավար Արամ Սաթյանը։

«Փառատոնի ծրագիրը մշակվում է Հայաստանի մշակույթի նախարարության հետ համատեղ։ Կհնչեն սիմֆոնիկ, կամերային, էստրադային, երգչախմբային ստեղծագործություններ, երաժշտական ստեղծագործություններ երեխաների համար»,– հայտնեց Սաթյանը։

Ըստ նրա, իրենց մասնակցությունն արդեն հաստատել են երկու սիմֆոնիկ նվագախմբեր և երգչախմբեր։

«Պայմանավորվածություն ունենք նաև ԱՄՆ–ում երաժշտական փառատոնի անցկացման, Չինաստանում, Իսպանիայում, Հունաստանում, Կորեայում և Արգենտինայում ելույթների մասին»,– ասաց Սաթյանը։

Ամփոփելով 2015 թվականի արդյունքները` Կոմպոզիտորների միության ղեկավարը հայտնեց, որ ծրագրված նախագծերը հաջողվեց իրագործել` չնայած որոշակի դժվարությունների։ Ըստ նրա, իր գլխավորած կազմակերպությանը, որը ներկայացնում է ազգային երաժշտությունն աշխարհում, պակասում է ֆինանսավորումը, ինչպես նաև մամուլի ուշադրությունը։

«Ֆրանսիայում կայացել է Հայոց ցեղասպանության 100–րդ տարելիցին նվիրված չորս համերգ։ Կազմակերպվել է մի շարք գործիքային և վոկալ համերգներ ԱՄՆ–ում»,– ասաց Սաթյանը։

Բացի այդ, 2015 թվականին Կոմպոզիտորների միության աջակցությամբ կազմակերպվել են բազմաթիվ փառատոներ։ Ներկայում աշխատանք է տարվում 2017 թվականի Միջազգային փառատոնի նախապատրաստման ուղղությամբ։

«Կոմպոզիտորների միությունն այսօր միավորում է տարբեր սերունդների երաժիշտների, թույլ է տալիս ժամանակակից երաժիշտների ներկայացնել իրենց արվեստը, լսել սեփական ստեղծագործությունները։ Դա հատկապես կարևոր է, քանի որ Հայաստանում շատ են տաղանդավոր կոմպոզիտորները, այդ թվում` երիտասարդ սերնդի ներկայացուցիչներ»,– ընդգծեց Սաթյանը։ Նրանց թվում Սաթյանը նշեց Միշել Պետրոսյանին, Արամ Հովհաննիսյանին, Դավիթ Սաթյանին։ -0-