Հայ հաքերներն ադրբեջանցիների հազարավոր գաղտնի տվյալներ են հրապարակել

ԵՐԵՎԱՆ, 30 հունվարի. /Նովոստի-Արմենիա/. Monte Melkonyan Cyber Army հայկական հաքերային խումբն ադրբեջանցիների գաղտնի փաստաթղթեր և անձնագրային տվյալներ է հրապարակել համացանցում։

Խումբը նվիրել է այդ գրոհը Հայոց բանակի 25–ամյակին։

«Շնորհավորում ենք Հայոց բանակի 25–ամյակը և փոքրիկ նվեր ենք անում մեր համարձակ արծիվներին, ովքեր զոհվել են մարտում և ովքեր հենց այս պահին պահպանում են մեր սահմանները»,– ասվում է խմբի` Facebook–ի էջում հրապարակած հայտարարությունում։

Ինչպես նշվում է հաղորդման մեջ, հաքերների խումբը բաց հասանելիությամբ հրապարակել է մոտ հազար ադրբեջանական անձնագրեր, ինչպես նաև որոշ գաղտնի փաստաթղթեր և տասնյակ հազարավոր տվյալներ (անուն, ազգանուն, փոստային հասցեներ, գաղտնաբառեր, IP–հասցեներ) հետևյալ ադրբեջանական կայքերից` bmm.az, citylife.az, dashinmazemlak.az, elan.az, geo.navigator.az, newmedia.az.

Հաքերները նաև իրենց հայտարարությանը կցում են կոտրած կայքերի ցուցակը և հրապարակած գաղտնի տվյալների բեռնման հղումները։ -0-