ԵՐԵՎԱՆ, 24 հունվարի./Նովոստի–Արմենիա/. Հայաստանում կփոխվեն դրոշմապիտակների նկատմամբ տեխնիկական պահանջները, տեղեկացրեց ՊԵԿ նախագահ Դավիթ Անանյանը հինգշաբթի կառավարության նիստից առաջ։
«Թեման քննարկել ենք այդ թվում վարչապետ Նիկոլ Փաշինյանի և առողջապահության նախարար Արսեն Թորոսյանի հետ։ Իսկապես դրոշմապիտակների հեշտ պոկվող ցելոֆանե հատվածը կարող է պատահարների առիթ դառնալ, և երեխաները կարող են կուլ տալ այն, ինչը վտանգ է շնչուղիների համար», – նշեց Անանյանը։
Այս կապակցությամբ, նրա խոսքով, որոշվել է փոխել դրոշմապիտակների տեխնիկական պահանջները։
«Այդ ցելոֆանե պատյանի հաստությունը 50 միկրոնից իջեցվել է 36 միկրոնի, բացի այդ, սոսինձն էլ ավելի ամուր է փակցվելու և լինելու է ավելի բարակ», – ասաց Անանյանն` ավելացնելով, որ չի կարելի դրոշմապիտակները դարձնել ամբողջությամբ չպոկվող, քանի որ այդ կերպ դրանց բազմակի օգտագործման հնարավորություն է ստեղծվում։
Հիշեցնենք, որ «Հայ ծնողների անկյուն» Facebook–յան խմբում ծնողները բարձրացրել են հեղուկների, այդ թվում` ջրի շշերի վրա փակցված դրոշմապիտակների հարցը։ Դրանք իսկական սպառնալիք են դարձել փոքրիկների համար
«Կուլ տալու, խեղդվելու բազմաթիվ դեպքերը վկայում են դրոշմապիտակների վտանգի մասին։ Դրոշմապիտակները ամեն ուր են, ամեն ինչի վրա փակցված են, հեշտությամբ պոկվում են և շատ հասանելի են մանկահասակ երեխաներին, խեղդվելու բազմաթիվ դեպքեր կան գրված Armenian Parents' Corner խմբում։ Հետևանքը կարող է անդառնալի լինել։ Խնդրում և պահանջում ենք համապատասխան մարմիններին լուծում տալ այս խնդրին: Այս հարցով պատրաստ ենք ցանկացած ֆորմատով համագործակցել», – նշել են APC–ից։
Այս հարցին անդրադարձել է նաև առողջապահության նախարար Արսեն Թորոսյանը` նշելով, որ հարցը քննարկել է ՊԵԿ նախագահ Դավիթ Անանյանի հետ՝ հասկանալու թե ինչպես կարելի է լուծել դրոշմապիտակների հետ կապված խնդիրը, երբ երեխաները պատահաբար դրանք կուլ են տալիս։
«Պարոն Անանյանը ինձ տեղեկացրեց, որ ՊԵԿ-ը նույնպես տեղյակ է խնդրին և արդեն քայլեր է ձեռնարկել այդ ուղղությամբ», – նշել է Թորոսյանը։–0–
