ԵՐԵՎԱՆ, 28 ապրիլի. /Նովոստի–Արմենիա/. Երկուշաբթի երեկոյան Երևանում ավտոբուսի պայթյունից տուժած երկու դեռահասների առողջական վիճակը շարունակում է կայուն ծանր մնալ, հինգշաբթի հայտնում է Հայաստանի առողջապահության նախարարությւոնը` հղում անելով «Սուրբ Աստվածամայր» բժշկական կենտրոնի մանկական վերակենդանացման և ինտենսիվ թերապիայի բաժնի պետ Աննա Չոբանյանին։
«Դեռահասների բուժման հետագա ընթացքը կանոնավոր կերպով քննարկվում է նեղ մասնագետների հետ, կատարվում է առողջական վիճակի գնահատում։ Այս փուլում տղաները բազմապրոֆիլ բուժում են ստանում»,– ասաց Չոբանյանը։
Առողջապահության նախարարության տեղեկության համաձայն, պայթյունից տուժած 37–ամյա հղի կնոջ վիճակը գնահատվում է բավարար, նա մնում է Վերարտադրողական առողջության, պերինաթոլոգիայի, մանկաբարձության և գինեկոլոգիայի ինստիտուտում։ Հայաստանի գլխավոր մանկաբարձ–գինեկոլոգ Ռազմիկ Աբրահամյանի գնահատմամբ, մոր և պտղի կյանքին այս պահին ոչինչ չի սպառնում։
«Արմենիա» հանրապետական բժշկական կենտրոնում բուժում են անցնում ևս երեք տուժածներ, նրանցից երկուսն օթոլարինգոլոգիայի բաժանմունքում են, երրորդը` նյարդավիրաբուժության բաժանմունքում։ Երեքի վիճակը գնահատվում է բավարար։
Ապրիլի 25–ի երեկոյան ահազանգ է ստացվել Երևանի Հալաբյան փողոցում` «Թումո» ստեղծարար տեխնոլոգիաների կենտրոնից ոչ հեռու, № 63 ավտոբուսի պայթյունի մասին։ Ճշտված տվյալներով, ավտոբուսի պայթյունի հետևանքով զոհվել է երկու մարդ, յոթ տուժածներ տեղափոխվել են հիվանդանոց։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
