Ռուբեն Ջաղինյանի հետ հարաբերությունները ոչ միայն լարված չեն, այլ առավել քան բարեկամական են. Ամիրյան

ԵՐԵՎԱՆ, 9 դեկտեմբերի. /Նովոստի–Արմենիա/. Հանրային ռադիոյի ղեկավար Արմեն Ամիրյանը, որը երեկ աշխատանքից ազատվելու  դիմում է ներկայացրել, քիչ առաջ ֆեյսբուքյան իր էջում այդ առթիվ դարձյալ գրառում է արել:

«Իմ դիմումի առթիվ տարատեսակ մեկնաբանություններ սկսվեցին, որոնցից որևէ մեկն իրականության հետ որևէ աղերս չունի:Հանրային ռադիոյի աշխատակիցներին ուղղված իմ շնորհակալական խոսքում շատ հստակ շարադրել էի աշխատանքից ազատվելու դիմումիս դրդապատճառը»,-գրել է Ամիրյանը:

Արմեն Ամիրյանը կոչ է արել դադարեցնել տարատեսակ մեկնաբանությունները: «Աշխատանքից ազատվելու դիմումս սահմանադրության հանրաքվեի հետ որևէ կապ չունի, կառավարության աշխատակազմի հետ ես որևէ խնդիր չունեմ, Ռուբեն Զաղինյանի հետ հարաբերությունները ոչ միայն լարված չեն, այլ` առավել քան բարեկամական են»,-պարզաբանել է նա:

Հայտնի է դարձել Հանրային ռադիոյի ղեկավարի հրաժարականի պատճառը և նոր ղեկավարի հնարավոր թեկնածուի անունը>>

«Հեռուստատեսության և ռադիոյի ոլորտում իմ երեք տասնամյակից ավել կուտակած փորձը, մասնագիտական գիտելիքներն ու կարողությունները ես ցանկանում եմ օգտագործել մեր ոլորտի ավելի լայն շրջանակի համար: Ուստի աշխատանքից ազատվելու և խորհրդի կազմում ընդգրկվելու ցանկությունն ու որոշումը բացառապես իմն է: Եվ քանի որ հեռուստատեսության և ռադիոյի մասին օրենքն արգելում է հանրային լրատվամիջոցի տնօրենին մասնակցել հանրային հեռուստառադիոընկերության խորհրդի անդամի թափուր պաշտոի մրցույթին, հետևաբար, ես իմ կամքով ներկայացրեցի աշխատանքից ազատման դիմում:

Կրկին խնդրում եմ չշահարկել այս հարցը, չթիրախավորել և անհիմն չմեկնաբանել: Այլապես, նոր աշխատանքի հետ կապված իմ բարի և դրական ցանկությունը արժեզրկվում է»,-նշել է Արմեն Ամիրյանը:-0-