Մոտ ժամանակներում հնարավորություն կստեղծվի ավելացնել ասպիրանտական տեղերը. Բարձրագույն որակավորման կոմիտեի նախագահը՝ ոլորտի նոր նախաձեռնությունների մասին

ԵՐԵՎԱՆ, 17 դեկտեմբերի./Նովոստի–Արմենիա/. Հայաստանում ընթացիկ տարում հաստատվել է 171 թեկնածուական և դոկտորական աստիճան: Որից 154-ը թեկնածուական է, 17-ը՝ դոկտորական: Պաշտպանությունների ցուցանիշը 2020 թ-ի համեմատ շատ քիչ տարբերությամբ աճել է, սակայն նախորդ տարիների համեմատ նկատելի նվազել է:

Այս մասին այսօր հրավիրված ասուլիսի ժամանակ ասաց Բարձրագույն որակավորման կոմիտեի նախագահ Կարեն Քեռյանը:

Նրա խոսքով՝ անկումը նկատելի է վերջին տարիների համեմատ: Նախկինում տարեկան լինում էր մոտ 600 պաշտպանություն է:

«Չնայած դրան, ընդհանուր պաշտպանությունների թիվը նվազել է, քանի որ 6-7 տարի առաջ տարեկան կտրվածքով մոտ 600 պաշտպանություն է եղել, իսկ հիմա պաշտպանությունների թիվը չորս անգամ նվազել է: Եվ այս պահին մեր ունեցած պաշտպանությունների քանակը նույնիսկ բավարար չէ գիտնականների սերնդափոխության և պրոֆեսորադասախոսական անձնակազմի համալրման համար»,-ասաց Քեռյանը:

Բարձրագույն որակավորման կոմիտեի նախագահը նշեց, որ 2018 թ.-ից հետո պայման է դրվել, ըստ որի պետք է ունենալ տպագրություն «Web of Science», «Scopus» շտեմարաններում տեղ գտած պարբերականներում: Դրանից հետո դոկտորականների թիվն էական նվազել է, սակայն մասնագետը նկատեց, որ ընթացիկ տարում 2020-ի համեմատ դոկտորականների պաշտպանության աճ է նկատվում:

«Պետք է ասեմ նաև, որ ասպիրանտներին տրվող տեղերի քանակով է որոշվում ելքը: Այսինքն, եթե շատ տեղեր տրվեն, ավելի շատ պաշտպանություններ կլինեն, բայց մի կողմից էլ եղած պոտենցիալից էլ ավելի շատ ասպիրանտական տեղեր հատկացնելն էլ կարող է բերել որակի էական նվազման»,-ասաց բարձրագույն որակավորման կոմիտեի նախագահը:

Քեռյանի խոսքով, այստեղ կարևոր է եղած պոտենցիալը հաշվի առնելը: Նա նկատեց, որ անհրաժեշտ են համալիր ուսումնասիրություններ ՝ հասկանալու, թե որ ուղղությամբ որքան շատ մասնագետներ են հարկավոր: Այդ ուսումնասիրությունները պետք է ցույց տան, թե ասպիրանտական տեղերը որ ուղղություններով է հատկապես պետք բաշխել:

Կարեն Քեռյանը կարևորեց որակական պահանջների, աստիճանաշնորհման համակարգի փոփոխությունների անհրաժեշտությունը:
Նա հավելեց նաև, որ մոտակա տարիների համար այնպիսի քաղաքականություն է որդեգրվել, որ պաշտպանության քանակն աճի գիտնականների բանակն ավելացնելու համար: Այս պահին քննարկումներ են գնում ԿԳՄՍ նախարարությունում, և մոտ ժամանակներում հնարավորություն կստեղծվի ասպիրանտական տեղերն ավելացնելու:-0-