ԵՐԵՎԱՆ, 19 սեպտեմբերի./Նովոստի–Արմենիա/. ՀՀ կառավարությունը քննարկում է պատանդների փոխանակման մասին Ադրբեջանի առաջարկը, հինգշաբթի լրագրողներին ասաց ՀՀ վարչապետ Նիկոլ Փաշինյանի խոսնակ Վլադիմիր Կարապետյանը։
Ավելի վաղ Ադրբեջանի ռազմագերիների, պատանդների և անհայտ կորածների հարցերով պետական հանձնաժողովը հայտարարել է, որ Բաքուն պատրաստ է Ադրբեջանում գտնվող ՀՀ քաղաքացիներ Կարեն Ղազարյանին և Արայիկ Ղազարյանին փոխանակել ԼՂՀ-ում դատապարտված Դիլհամ Ասկերովի և Շահբազ Գուլիևի հետ։
«Հաշվի առնելով հարցի նրբությունը՝ դրա մասին հրապարակային կհայտնենք, երբ որոշումներին մոտ լինենք», - ասաց նա։
Օգոստոսի 12-ին, ժամը 12:00-ի սահմաններում Արցախի ՊԲ հարավարևելյան ուղղությամբ տեղակայված զորամասից, դեռևս չպարզված հանգամանքներում, զինծառայող 2000 թվականին ծնված Արայիկ Ղազարյանը լքել է մարտական դիրքերը: Ադրբեջանը հայտարարել է, որ զինծառայողը գտնվում է իրենց մոտ: Ավելի ուշ ՀՀ ՊՆ–ն հաստատել է այդ տեղեկատվությունը։
ՀՀ քաղաքացի Կարեն Ղազարյանը փետրվարի 27–ին Ադրբեջանում դատապարտվել է 20 տարվա ազատազրկման: Նա հայտնվել է Ադրբեջանի սահմանին 2018 թվականի հուլիսին չպարզված պայմաններում, սակայն Ադրբեջանում նրան դիվերսանտ են համարում:
Ադրբեջանի քաղաքացիներ Գուլիևն ու Ասկերովը 2014 թվականի ԼՂՀ ընդհանուր իրավասության դատարանի կողմից դատապարտվել են 22 տարվա ազատազրկման և ցմահ դատապարտման՝ դեռահասի սպանության, ԼՂՀ սահմանի ապօրինի հատման, զենքի պահման և լռտեսության, ինչպես նաև հայոց բանակի սպայի սպանության համար:–0–