ԵՐԵՎԱՆ, 21 փետրվարի./Նովոստի Արմենիա/. Արցախյան 44–օրյա պատերազմի մասնակիցներն այսօր փակել էին «Զվարթնոց» օդանավակայան տանող ճանապարհը։ Նրանք դեմ էին ադրբեջանական պատվիրակության անդամների Երևան ժամանելուն։
Հիշեցնենք, որ ադրբեջանցի երկու պատգամավոր ժամանել է Երևան` «Եվրանեսթի» խորհրդարանական վեհաժողովի նիստերին մասնակցելու նպատակով, որոնք փետրվարի 21–ին և 22–ին անցկացվելու են Երևանում։
Ցուցարարները լրագրողների հետ զրույցում նշեցին, որ դեմ են նաև Երևան-Ստամբուլ չվերթերի իրականացմանը:
«Վաղը գալու են ձեզ ուտեն։ Մի հատ ԱՊՊԱ-ի 3000-ի համար 500 մարդ էր հավաքվում, թուրքը եկել, «բողազներիս» է չոքել։ Չենք թողնելու էստեղ թուրք մտնի։ Երեխեքի դիակները հավաքել ենք, որ տանք ծնողներին, էսօր թուրքին ասում են՝ էստի համեցեք»,-ասաց ակցիայի մասնակիցներից մեկը։
Նրա խոսքով՝ ակցիայի մասնակիցները 44–օրյա պատերազմին մասնակցած կամավորներներն են։
«Հավաքվել ենք թուրքերի հետ ընկերություն չանելու համար։ Տղերքը սահմանին կանգնած են, որպեսզի թույլ չտան թուրքերի առաջխաղացումը, իսկ ստեղ ազատ թողնում են, որ նրանք գան ու թեյ կամ սուրճ խմեն»,- ասաց ակցիայի մասնակիցը։
Ակցիային միջամտեց ոստիկանությունը և փորձեց ուժով բացել փողոցի երթևեկելի մասը, ինչի հետևանքով քաշքշուկ սկսվեց։
Ոստիկանության մի քանի անհաջող փորձից հետո նրանց հաջողվեց վերականգնել երթևեկությունը։ Ակցիայի մասնակիցները խոստացան ավելի մեծ և լուրջ ակցիաներ կազմակերպել, եթե իրենց պահանջները չբավարարվեն։
Նշենք, որ վարչապետ Նիկոլ Փաշինյանն արդեն ընդունել է ԵՄ խորհրդարանի անդամ, «Եվրանեսթ» խորհրդարանական վեհաժողովի համանախագահ Անդրիուս Կուբիլիուսի գլխավորած պատվիրակությանը: Վարչապետը ողջունել է Երևանում «Եվրանեսթ» խորհրդարանական վեհաժողովի բյուրոյի ու հանձնաժողովների նիստերի անցկացումը և նշել, որ դրանք կարևոր հարթակ են համագործակցության զարգացման ու երկխոսության համար:
Փաշինյանն ընդգծել է, որ Եվրոպական միությունը հանդիսանում է մեր երկրի կարևոր գործընկերներից մեկը՝ ընդգծելով ժողովրդավարական բարեփոխումների արդյունավետ իրականացման գործում առկա փոխգործակցությունը: Վարչապետի խոսքով՝ ժողովրդավարության զարգացման օրակարգը ՀՀ կառավարության առաջնահերթություններից մեկն է և այդ ուղղությամբ քայլերը շարունակելու են կրել հետևողական ու շարունակական բնույթ:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում