Ավանեսյանը նշեց, թե պատվաստված քանի մարդ է հոսպիտալացված ու գտնվում վերակենդանացման բաժանմունքում
ԵՐԵՎԱՆ, 28 հոկտեմբերի./Նովոստի–Արմենիա/. Այս պահին կորոնավիրուսով դրական ակտիվ դեպքերի 30433 քաղաքացիների շրջանում պատվաստված քաղաքացիներն ընդամենը 1702–ն են, ասաց ՀՀ առողջապահության նախարար Անահիտ Ավանեսյանն այսօր կառավարության նիստի ժամանակ։
Նա նշեց, որ հոսպիտալացված մոտ 3100 քաղաքացիների շրջանում պատվաստվածների թիվն ընդամենը 96–ն է, վերակենդանացման բաժանմունքում կա ընդամենը 5 պատվաստված։
«Այս պահին մոբիլիզացված են 27 բուժկենտրոններ, որոնք սպասարկում են COVID–ով պացիենտներին։ Ունենք ծանր վիճակում գտնվող 1088 քաղաքացի, ծայրահեղ ծանր վիճակում գտնվող 307 քաղաքացի, թոքերի օդափոխության սարքին միացված 152 քաղաքացի», – ասաց նախաարը։
Նա նշեց, որ այս շտամը բավականին ագրեսիվ ընթացք է ունենում նաև հղիների մոտ։
«Այս պահին ունենք 122 հղի, ովքեր հոսպիտալացված են, որոնցից 53–ի մոտ առկա է թոքաբորբ և թթվածնային կախյալ են», – նշեց նախարարը։–0–
