ԱՊՊԱ-ն թանկանալու է. Երևանում վարորդները բողոքի ակցիա էին կազմակերպել, կան բերման ենթարկվածներ

ԵՐԵՎԱՆ, 31 հունվարի./Նովոստի-Արմենիա/. Երևանի կենտրոնում՝ Հանրապետության հրապարակում, ավտոմեքենաների սեփականատերերը և տաքսու վարորդները բողոքի ակցիա էին կազմակերպել, նրանք դժգոհում էին ԱՊՊԱ-ի սպասվող թանկացումներից։

Ինչպես նշվում է Հայաստանի ավտոապահովագրողների բյուրոյի կայքում, 2022 թ.-ի փետրվարի 7-ից ուժի մեջ են մտնում ԱՊՊԱ-ի հաշվարկման նոր կանոնները, որոնց համաձայն, մասնավորապես, բազային ապահովագրավճարի չափը կավելանա 1 500-3 000 դրամով (ավելի քան 3-6 դոլար):

Վարորդները հավաքվել էին կառավարության շենքի դիմաց: Նրանք մեքենաներով և միացված ազդանշաններով անցան հրապարակին հարակից փողոցներով: Դեպքի վայրում հավաքվել էին ոստիկանական ուժեր:

Բողոքի ակցիայի ժամանակ տեղի ունեցան բախումներ ցուցարարների և ոստիկանների միջև, մի քանի մարդ բերման ենթարկվեց: Դեպքի վայր ժամանած ավտոքարշակները հրապարակից հեռացրեցին ցուցարարների ավտոմեքենաները:-0-