ԵՐԵՎԱՆ, 5 մարտի. /Նովոստի–Արմենիա/. Շաբաթ օրը Երևանում, ՀՀ նախագահ Սերժ Սարգսյանի ներկայությամբ, բացվեց Rossia Mall առևտրի կենտրոնը։
«ՍԻԼ» կոնցեռնի հիմնադիր և Rossia Mall–ի համասեփականատեր Խաչատուր Սուքիասյանի խոսքով` նոր առևտրի կենտրոնն առանձնանում է իր յուրահատուկ կոնստրուկտորական լուծումներով և կնպաստի փոքր ու միջին բիզնեսի զարգացմանը։
Սուքիասյանն ընդգծեց, որ նման կենտրոնի գործարկումը կնպաստի նաև տուրիզմի զարգացմանը։
«Հայաստանում կան մեծ հնարավորություններ ցանկացած արտադրություն հիմնելու համար։ Խոսքն, առաջին հերթին, սպառողական ապրանքների մասին է, Հայաստանն ի վիճակի է արտադրել մրցունակ արտադրանք», – նշեց նա։
Սուքիասյանի խոսքով` երկրում անհրաժեշտ է նպաստել բիզնեսի զարգացմանը, մասնավորապես, միկրովարկերի տրամադրման միջոցով, անհրաժեշտության դեպքում հրավիրել մասնագետների, որոնք կկարողանան աջակցել ՓՄՁ–ի զարգացմանը։
Սուքիասյանը կոչ արեց աջակցել հայրենական արտադրողին և ձեռք բերել հայկական ապրանքանիշեր։
Rossia Mall–ի կառուցման մեջ կատարված ներդրումների ծավալը փետրվարի վերջի դրությամբ կազմել է 15 մլն դոլար։ Վեց հարկանի շենքը գտնվում է մետրոյի «Զորավար Անդրանիկ» կայարանի մոտակայքում։ Առևտրի կենտրոնը համապատասխանում է եվրոպական բոլոր չափանիշներին։ Շինության ընդհանուր մակերեսը 12,6 հազար քմ է, որից 8 հազարն առևտրային հարթակներ են։ Կենտրոնում ներկայացված է համաշխարհային հայտնի ապրանքանիշերի արտադրանքը, գործում են սրճարաններ, կա նաև ժամանցային ենթակառուցվածք։ Նոր կենտրոնում ավելի քան 350 աշխատատեղ կբացվի։–0–
