ԵՐԵՎԱՆ, 13 փետրվարի. /Նովոստի–Արմենիա/. Վատացնելով շփման գծում տիրող իրավիճակն ու չպահպանելով ձեռք բերված պայմանավորվածությունները` պաշտոնական Բաքուն բանակցային գործընթացը փակուղի է տանում, հայտարարեց «Հայացք» կիրառական քաղաքականության և հետազոտությունների վերլուծական կենտրոնի ղեկավար Նարեկ Մինասյանը։
Ինչպես նշեց Մինասյանը երկուշաբթի «Նովոստի–Արմենիա» մամուլի կենտրոնում, 2016 թ.–ի ապրիլին շփման գծում իրավիճակի սրացումից հետո Բաքուն հարաբերականորեն պահպանել է հրադադարի ռեժիմը, այդուհանդերձ արդեն 2016 թ.–ի երկրորդ կեսին սահմանի լարվածությունը դարձավ ակնհայտ։
ԼՂՀ ՊՆ–ն հերքում է ադրբեջանական հերթական ապատեղեկատվությունը>>
«Միաժամանակ արդեն դեկտեմբերին մենք դարձանք Ադրբեջանի կողմից դիվերսիայի փորձերի ականատեսը», – ավելացրեց Մինասյանը։
Նրա խոսքով, իրատեսական չէ նման պայմաններում դրական առաջընթաց ակնկալել փետրվարին Մյունխենում նախատեսված Հայաստանի և Ադրբեջանի ԱԳ նախարարների հանդիպումից։
«Սակայն հարկավոր է օգտվել այդ հանդիպումից` Ադրբեջանին և ՄԽ համանախագահներին կոնկրետ ուղերձ հղելու համար», – ավելացրեց Մինասյանը։
«Ես եղել եմ Արցախում, չեմ կարող ընդունել հրավերը». Կոմանդոսը հրաժարվել է այցելել Բելառուս>>
Նա ընդգծեց, որ վերջին ամիսների ընթացքում աճել է հայկական կողմի դիրքորոշումը վերանայելու ակտուալությունը։
«Դա, մասնավորապես, պայմանավորված է շփման գծում Ադրբեջանի ապակառուցողական դիրքորոշմամբ։ Չհասնելով հաջողության բանակցություններում և ռազմական գործողությունների միջոցով` Ադրբեջանը վերջին շրջանում իր ապակառուցողականությունն ուղղել է նաև հարակից ոլորտներ, ինչի հետևանքով մենք հիմա ունենք Լապշինի գործը, որոշակի ճնշում միջազգային կազմակերպությունների կողմից», – ավելացրեց Մինասյանը։
Նա նաև նշեց, որ նման պայմաններում հակահարվածի անհրաժեշտություն է առաջանում` ընդգծելով, որ այս հարցում իրենց դերակատարությունը պետք է ունենան նաև միջազգային միջնորդները։
Դեկտեմբերի կեսերին Իսրայելի քաղաքացի Լապշինը, ով նաև ՌԴ քաղաքացի է, գրել է, որ իրեն ձերբակալել են Մինսկում` Ադրբեջանի հայցով, որտեղ նա ներառված է «սև ցուցակում»` առանց ադրբեջանական իշխանությունների համաձայնության Լեռնային Ղարաբաղ այցելելու համար:
Փետրվարի 7-ին Բելառուսի Գերագույն դատարանը մերժել է բլոգեր Ալեքսանդր Լապշինի բողոքը, որով նա բողոքարկում էր իրեն Ադրբեջանին արտահանձնելու որոշումը։ Ուշ երեկոյան հայտնի դարձավ, որ բլոգերը հատուկ չվերթով Մինսկից տեղափոխվել է Բաքու։–0–
